Բաքվում ԵԱՀԿ գրասենյակի փակումը Ադրբեջանի ղեկավարության ավտորիտարիզմի հերթական դրսեւորումն է: Այս մասին, այսօր՝ հուլիսի 30-ին, կառավարության նիստից հետո լրագրողների հետ զրույցում նշել է Հայաստանի ԱԳ փոխնախարար Շավարշ Քոչարյանը:
Նրա խոսքով, իրավիճակը պետք է դիտարկել լայն ենթատեքստով. «Freedom House» միջազգային կազմակերպությունն արդեն Ադրբեջանը համարում է կայուն ավտորիտարիզմի երկիր: «Ադրբեջանում իշխող ռեժիմը իր ժողովրդի համար այլ առանցք չի գտել, քան հայերի նկատմամբ ատելությունն է: Այստեղից էլ հայհոյանքներն ուղղված միջազգային կազմակերպություններին, որոնք կասկածվում են հայերին համակրելու մեջ: Պետք է արտաքին թշնամու կերպար ստեղծել, որպեսզի այդ կերպարի վրա դնել երկրում խնդիրների առկայության համար իրենց մեղքը»,-հավելել է Քոչարյանը:
Հիշեցնենք, որ հունիսի սկզբին Բաքուն նամակ է հղել ԵԱՀԿ շտաբ-բնակարան, որտեղ տեղեկացրել է Բաքվում այդ կազմակերպության ներկայացուցչության փակման մասին: Ավելի վաղ՝ 2013-ին, Բաքվում ԵԱՀԿ ներկայացուցչության կարգավիճակը նվազեցվել էր եւ հասցվել համակարգողի կարգավիճակի:
