Մինչեւ 2015 թ վերջը Հայաստանում փոքր ու միջին բիզնեսի ստուգումների թիվը կտրուկ կկրճատվի։ Համապատասխան որոշման նախագիծն, այսօր՝ հուլիսի 30-ին, Կառավարության նիստի ժամանակ  ներկայացրել է Կառավարության աշխատակազմի ղեկավար-նախարար Դավիթ Հարությունյանը։

Մինչեւ 2016 թ․ հունվարի մեկը փոքր ու միջին բիզնեսի ստուգումները (բացառությամբ հարկային եւ մաքսային) հնարավոր կլինի անցկացնել միայն պետական ու ՏԻՄ կազմակերպություններում եւ 100 տոկոսով պետական եւ ՏԻՄ ընկերություններում։ Մասնավոր ընկերություններում ստուգումներ կանցկացվեն միայն Քրեական օրենսգրքով նախատեսված դեպքերում։ Սննդամթերքի անվտանգությունը ստուգելու նպատակով ստուգայցեր կկազմակերպվեն նաեւ մասնավոր դպրոցներում ու մանկապարտեզներում։ Ստուգումներ հնարավոր է անցկացնել նաեւ հասարակական անվտանգությանը, մարդկանց կյանքին ու առողջությանը, ինչպես նաեւ պետությանը սպառնացող վտանգների դեպքում, բայց միայն վարչապետի գրավոր համաձայնությամբ՝ պետական կառույցների ներկայացրած հայտարարությունների   ուսումնասիրության հիման վրա։

 Վարչապետ Հովիկ Աբրահամյանը բոլոր նախարարներին հանձնարարել է հետեւել որոշման կատարմանը։ Ստուգումների թիվը կրճատելու նպատակով անհրաժեշտ է նաեւ վերանայել ռիսկերի սանդղակը։ «Մյուս կողմից էլ, տնտեսվարող սուբյեկտներին  կոչ եմ անում բարեխղճորեն կատարել իրենց պարտավորությունները»,- հայտարարել է վարչապետը։ Ստուգումների համարժեքությանը վերաբերող ցանկացած  բողոք  կքննարկվի Կառավարությունում եւ վարչապետին առընթեր վերահսկիչ ծառայությունում։