ԱՄՆ-ում առաջարկել են քրեական գործ հարուցել Զիմբաբվեի արգելոցում անօրինական որսի ժամանակ հայտնի առյուծին՝ Սեսիլին սպանած ամերիկացի ատամնաբույժ Ուոլթեր Փալմերի դեմ: Ըստ The Daily Telegraph-ի, նախաձեռնությունն ամերիկյան Կոնգրեսի Ներկայացուցիչների պալատի անդամ, դեմոկրատ Բեթթի ՄաքՔոլամինն է:
Lenta-ի փոխանցմամբ, ՄաքՔոլամը դիմել է US Fish and Wildlife Service դաշնային բնապահպանական ծառայություն եւ դաշնային դատախազություն՝ խնդրելով կենդանու սպանության հետ կապված միջադեպը հետաքննել ամերիկյան օրենսդրության համաձայն:
«Հազվագյուտ կենդանու սպանությունը՝ հանուն սպորտային հետաքրքրության, որս չէ: Դա սարսափելի դաժանության ամոթալի արտահայտություն է»,- հայտարարել է ՄաքՔոլամը:
Զիմբաբվեի ամենահայտնի առյուծին՝ 13-ամյա Սեսիլին, Փալմերը սպանել է Նվանգեի ազգային պարկում: Իշխանություննրեը պարզել են, որ ամերիկացին անօրինական որսի կազմակերպիչներին 54 հազար դոլար է վճարել՝ առյուծի որսի իրավունք ստանալու համար: Փորձագետները պարզել են նաեւ, որ Սեսիլն անմիջապես չի մահացել: Կրակելուց հետո որսորդները շուրջ 40 ժամ հետեւել են նրան՝ որսն ավարտին հասցնելու համար: