Tesla ընկերությունը սկսում է զեղչերի ու բոնուսների վրա հիմնված՝ հաճախորդներ հրապուրելու նոր փորձարարական ծրագիր։ Այս մասին հայտնում է Mashable պարբերականը։ Ինչպես պարզաբանել է ընկերության նախագահ Իլոն Մասկը, էլեկտրական Tesla Model S-ի յուրաքանչյուր գնորդի հազար դոլարի չափով զեղչ կտրամադրվի, եթե գնորդը ներկայացնի նույն մոդելի մեքենայի սեփականատիրոջ կողմից տրված երաշխավորագիր։ Ընդ որում Tesla Model S-ի սեփականատերը, որը տվել է այդ երաշխավորագիրը, համարժեք գումարի վկայական կստանա, որը հնարավոր կլինի ծախսել նոր ավտոմեքենայի, աքսեսուարների կամ տեխսպասարկման վրա։
Ընկերության նախագահը իր հաճախորդներին գրած նամակներում բացատրել է, որ այդպիսով Tesla-ն ստիպված չի լինի նոր ավտոսրահներ բացել։ Իսկ քանի որ մեկ Model S-ի վաճառքը ընկերության համար արժենում է 2 հազար դոլար, ապա Tesla-ն կարող է տնտեսած գումարը վերադարձնել իր գնորդներին։
Բացի այդ, 5 նոր գնորդ բերելու դեպքում երաշխավորագիր տված սեփականատերերը «Գիգաֆաբրիկա» ավտոգործարան այցելելու հնարավորություն կստանան, գրում է Gazeta-ն։