Հայաստանում ոչ բոլոր արտոնություն ունեցողներն են տեղյակ դեղամիջոցների՝ իրենց հասանելիք  զեղչերից: Այս մասին, այսօր՝ հուլիսի 31-ին, լրագրողների հետ հանդիպման ժամանակ նշել է «Իրազեկ եւ պաշտպանված սպառող» հասարակական կազմակերպության ղեկավար Բաբկեն Պիպոյանը՝ հավելելով, որ միջին տարիքի մարդիկ առավել վատ են տեղեկացված, քան տարեցները:

Պիպոյանը հիշեցրել է, որ դեղամիջոցների զեղչային բաշխումը կարգավորվում է  կառավարության 2006 թվականի որոշմամբ: Ըստ այդ որոշման, անվճար դեղամիջոցներ են տրամադրվում 1-ին եւ 2-րդ խմբի հաշմանդամներին, հաշմանդամը երեխաներին, պատերազմի վետերաններին եւ նրանց հավասարեցված անձանց, առանց ծնողական խնամքի երեխաներին, բազմազավակ ընտանիքների երեխաներին (4 եւ ավելի անչափահաս երեխաներ), զոհված զինծառայողների ընտանիքի անդամներին, հաշմանդամներ ունեցող ընտանիքի երեխաներին, մինչեւ 7 տարեկան երեխաներին:

Դեղամիջոցները 50 տոկոս զեղչով տրամադրվում են 3-րդ խմբի հաշմանդամներին, Չեռնոբիլի վթարի վերացման աշխատանքների մասնակիցներին, միայնակ թոշակառուներին, այն ընտանիքներին, որտեղ թոշակառուների խնամքի տակ երեխաներ կան, միայնակ մայրերի երեխաներին: Թոշակառուներին (որոնք ընդգրկված չեն այլ խմբերում) դեղամիջոցները տրամադրվում է 30 տոկոս զեղչով:

Նշենք, որ այս արտոնությունները նախատեսված են ամբուլատոր-պոլիկլինկական հաստատությունների միջոցով ձեռք բերվող դեղամիջոցներին: