Զիմբաբվեն պահանջել է, որ ԱՄՆ-ն արտահանձնի որսորդ Ուոլթեր Փալմերին, ով ապօրինաբար սպանել է Սեսիլ մականունով հանրահայտ առյուծին։ Շրջակա միջավայրի, ջրային ռեսուրսների ու կլիմայի պաշտպանության նախարար Օփփա Մուչինգուրին հայտարարել է․ «Մենք իրավասու իշխանություններից պահանջում ենք որսորդին արտահանձնել Զիմբաբվեին, որպեսզի նա կանգնի դատարանի առջեւ իր կատարած հանցագործությունների համար»,-հայտնում է ՏԱՍՍ-ը։
Հիշեցնենք, որ երկու օր առաջ Զիմբաբվեում սկսվել է Խվանգե ազգային պարկի Սեսիլ առյուծի սպանության գործով երկու մեղադրյալների դատավարությունը։ Խվանգե քաղաքի դատարանի առաջ են կանգնել Զիմբաբվեի քաղաքացիներ Տեո Բրոնկհորստը ու Օնեստ Նդլովուն, ում ամերիկացի ունեւոր որսորդ Ուոլթեր Փալմերը 50 հազար դոլար էր վճարել, որպեսզի նրանք պահպանվող տարածքից դուրս հանեին երկրի ամենանշանավոր առյուծին ու նրան սպանելու հնարավորություն տային։ Նրանց ներկայացվել է մեղադրանք որսագողության համար։ Այս իրադարձությունը սոցցանցերում վրդովմունքի փոթորիկ եւ քննադատությունների տեղատարափ է առաջացրել։