Երեւանի Սիմոն Վրացյան փողոցի բնակիչները բողոքում են, որ քաղաքապետարանը կանաչապատելու փոխարեն ասֆալտապատել է փողոցի՝ նախկին խոտածածկ տարածքը: Բնակիչներից Սամվել Սարգսյանը NEWS.am-ի հետ զրույցում ասաց, որ տարածքն ասֆալտապատել են երկու օր առաջ:
«Սովետական տարիներին այդ տարածքում գազոն էր ՝ ծաղիկներով, կանաչով: Տարիներ հետո տարածքի ծառերը քիչ-քիչ հատեցին, որոշ մասն էլ չորացավ: Հիմա փոխարենը ծառ տնկեն, կանաչապատեն, օդ լինի շնչելու, մի քանի օր առաջ բերեցին, գրունտ լցրին ու ասֆալտապատեցին»,- ասաց Սամվել Սարգսյանը:
Վրացյան փողոցում՝ ասֆալտապատված տարածքի հարեւանությամբ, սեփական տներ են, որոնցից մեկում էլ բնակվում է Սամվել Սարգսյանը: Տարածքը գտնվում է Վազգեն Սարգսյանի անվան հանրապետական մարզադաշտի հարեւանությամբ, որտեղ օգոստոսի 2-ին կայանալու է Համահայկական ամառային 6-րդ խաղերի բացման արարողությունը: Բնակիչները ենթադրում են, որ տարածքն ասֆալտապատել են արարողությանն ընդառաջ տարածքը մաքրելու, հետո այն վճարովի ավտոկայանատեղի դարձնելու համար:
«Ցուցադրելու համար են անում, թե մենք ասֆալտապատ քաղաք ունենք, բայց դրա համար պետք է գազոնն ասֆալտապատե՞ին կանաչապատելու փոխարեն: Հետո էլ ժամը 500 դրամով կայանատեղի կսարքեն ու փող կաշխատեն»,- ասաց Սամվել Սարգսյանը:
Ասֆալտապատված տարածքի հարեւանությամբ աշխատող տղամարդկանցից մեկը, ընդհակառակը, NEWS.am-ի հետ զրույցում նշեց, որ իրեն ու տարածքում աշխատողներին դուր է գալիս ասֆալտապատված տարածքը, քանի որ նախկինում այնտեղ միայն հող էր եւ տարբեր տեսակի աղբ էր թափված:
Բնակիչները որեւէ պատկան մարմնի դեռ չեն դիմել: Քաղաքապետարանից մեզ խոստացան պարզաբանում տալ՝ տարածք այցելելուց եւ խնդիրն ուսումնասիրելուց հետո: