ԱՄՆ-ը կօգնի ուժեղացնել վերահսկողությունը ԼՂ հակամարտության գոտում հրադադարը պահպանելու համար: Այս մասին Վաշինգթոնում հայ համայնքի ներկայացուցիչների հետ հանդիպման ժամանակ հայտարարել է Հայաստանի պաշտպանության նախարարի առաջին տեղակալ Դավիթ Տոնոյանը:
Ինչպես Վաշինգթոնից հայտնում է NEWS.am-ի թղթակիցը, Վաշինգթոնում ԱՄՆ դեսպանատանը տեղի ունեցած հանդիպմանը մասնակցել են Ամերիկայի հայկական համագումարի եւ ՀՅԴ Հայ դատի Ամերիկայի հանձնախմբի ներկայացուցիչները: Տոնոյանի խոսքով, Վաշինգթոնում պաշտպանական եւ արտաքին քաղաքական գերատեսչությունների ներկայացուցիչներն իր հետ հանդիպումների ժամանակ ընդգծել են, որ ԱՄՆ-ը չափազանց շահագրգիռ է ԼՂ հակամարտության գոտում հրադադարի պահպանմամբ եւ պատրաստ է աջակցություն ցուցաբերել այդ գոտում վերահսկողությունն ուժեղացնելու հարցում:
«Ինչպես Պենտագոնում, այնպես էլ Պետքարտուղարությունում ընդգծվել է, որ անհրաժեշտ է ուժեղացնել միջոցառումները, որոնք կնպաստեն խաղաղության պահպանմանը: Դրանք նախեւառաջ վստահության ամրապնդմանն ուղղված միջոցառումներն են: Հրադադարի խախտման կանխարգելիչ միջոցառումների առումով, հսկայական դեր է խաղում հետաքննությունների մեխանիզմների ստեղծումը»,-նշել է Տոնոյանը:
Նրա խոսքով, միջազգային դիտորդներին պետք է հրադադարի ռեժիմի խախտման դեպքերի հետաքննություն անցկացնելու մանդատ տրվի, որն իր մեջ ներառում է մեծ լիազորություններ, ինչպես նաեւ միջազգային դիտորդների հովանու ներքո սահմանին ու զինված ուժերի շփման գծում հատուկ ցուցիչներ տեղադրելու հնարավորություն, որը սթափեցնող ազդեցություն կունենա:
ՀՀ պաշտպանության փոխնախարարն ընդգծել է, որ հայկական կողմը չի ցանկանում եւ թույլ չի տա պատերազմ: «ԼՂ հակամարտությունը չունի ռազմական լուխում: Ռազմական ճանապարհով հարցն արդեն լուծվել է»,-հավելել է նա:
Անդրադառնալով ռազմական ոլորտում հայ-ամերիկյան համագործակցության այլ ոլորտներին, Տոնոյանը նշել է երեք հիմնական ուղղություն. Նախ ԱՄՆ-ը կշարունակեն աջակցել ՀՀ պաշտպանական ոլորտում ընթացող բարեփոխումներին, երկրորդ՝ ԱՄՆ-ը կաջակցի հայ խաղաղապահներին Աֆղանստանում, Կոսովոյում, Լիբանանում, իսկ ապագայում հնարավոր է նաեւ Մալիում: Բացի այդ, Հայաստանը պարտավորվել է ՄԱԿ-ի հովանու ներքո իրականացվող խաղաղապահ գործողությունների համար առանձին պրոֆիլային գումարտակներ տրամադրել: