Իրանի իշխանությունները մտադիր են ամեն տարի երկրի ավիապարկի թարմացման ծրագրի շրջանակներում Boeing եւ Airbus ընկերություններից մոտ 80-90 ինքնաթիռ գնել։ Այս մասին հայտարարել է Իրանի Իսլամական Հանրապետության Քաղավիացիայի կազմակերպության ղեկավարության ներկայացուցիչ Մուհամմեդ Հադա Քարմին։
«Իրանը ընդհանուր առմամբ երկու խոշոր ավիաընկերություններից երկրի ավիապարկի թարմացման ծրագրի շրջանակներում մտադիր է 80-90 ինքնաթիռ գնել»,- ասել է Հադա Քարմին, գրում է IRNA-ն։
Կազմակերպության ներկայացուցչի խոսքով՝ Իրանի միջուկային ծրագրի շուրջ համաձայնության շրջանակներում օդանավերի առքուվաճառքի եւ վարձակալության սահմանափակումները նույնպես կհանվեն։
Անդրադառնալով գնման ծավալներին՝ Հադա Քարմին նշել է, որ այդ պլանի համաձայն՝ 3 տարվա ընթացքում Իրանի ավիապարկի ինքնաթիռների թիվը կհասնի 300-ի։
Գործակալությունը նշում է, որ Boeing եւ Airbus ընկերությունները արդեն հաստատել են Թեհրանին օդանավեր վաճառելու իրենց մտադրությունը, գրում է ՏԱՍՍ-ը։
