Ուկրաինայի նախագահ Պյոտր Պորոշենկոն Մարիա Գայդարին Ուկրաինայի քաղաքացիություն է շնորհել, հաղորդում է նախագահի կայքը:
Գայդարի հետ միասին քաղաքացիություն է ստացել «Forbes Ուկրաինա» ամսագրի նախկին գլխավոր խմբագիր Վլադիմիր Ֆեդորինը, ով եւս ՌԴ քաղաքացի է:
«Ուկրաինայի նախագահ Պյոտր Պորոշենկոն քաղաքացիություն շնորհելու վերաբերյալ հրամանագիր է ստորագրել եւ ուկրաինական անձնագրեր հանձնել ռուսաստանցի հասարակական գործիչ Մարիա Գայդարին եւ ռուսաստանցի լրագրող, «Forbes Ուկրաինա» ամսագրի նախկին գլխավոր խմբագիր Վլադիմիր Ֆեդորինին»,-ասված է հաղորդագրության մեջ:
Պորոշենկոն մաղթել է նրանց չկորցնել կապը Ռուսաստանի հետ: «Ձեր անկողմնակալ դիրքորոշումը, կարծիքը եւ տեղեկատվությունն Ուկրաինայից որպես կրեմլյան քարոզչության այլընտրանք շատ կարեւոր է միլիոնավոր ռուսաստանցիների համար»,-հայտարարել է Պորոշենկոն:
Մարիա Գայդարն իր հերթին հայտարարել է, որ պատրաստ է կիսել ուկրաինացի ժողովրդի ճակատագիրը ընդհանուր թշնամու դեմ պայքարում: Նա որպես ընդհանուր թշնամի նշել է «ավտորիտար ռեժիմը, որը սպանում է մարդկանց թե Ռուսաստանում, թե այստեղ»: