Անցյալ շաբաթ հնդկաձավարի մեծածախ գներն աճել են 1,685 ռուբլով, եւ այժմ հնդկաձավարի մեկ տոննան արժե 39,915 ռուբլի, գրում է «Ինտերֆաքսը»։
Անցյալ տարվա հուլիս ամսին մեկ տոննա հնդկաձավարի գինը կազմում էր ընդամենը 16,673 ռուբլի։ Ինչպես պատմել է Ագրարային շուկայի կոնյուկտուրայի ինստիտուտի գլխավոր տնօրենի տեղակալ Իրինա Գլազունովան, գարնան սկզբից ի վեր հնդկաձավարի շատ արտադրողներ մատակարարման խնդիրներ են ունեցել , որովհետեւ աշնանը Ալթայան նահանգում, որը հնդկաձավարի հիմնական արտադրողն է, չեն կարողացել հավաքել ամբողջ բերքը։ Դա կապված է եղել եղանակային պայմանների հետ։ Արդյունքում հավաքվել է ընդամենը 662 հազար տոննա, որը մի քիչ ավելի է, քան ռուսաստանյան շուկայի նվազագույն պահանջարկը։ Մի տարի առաջ բերքի ընդհանուր զանգվածը կազմել է 834 հազար տոննա։
Գյուղատնտեսության նախարարության կանխատեսմամբ, այս տարի կհավաքվի մոտ 780 հազար տոննա։ Իհարկե, այդ թիվը կասկածներ է հարուցում փորձագետների շրջանում, նախ եւ առաջ նրա համար, որ ցանքատարածությունները կրճատվել են։
Հիշեցնենք, որ նախկինում Ռուսաստանում կտրուկ աճել էր բրնձի գինը։ «ՊրոԶերնո» ԲԲԸ-ի տվյալներով, բրնձի գները երկու շաբաթ առաջ թռել են միանգամից 3,5 հազար ռուբլով՝ հասնելով մինչեւ 39 835 ռուբլու։