Lexus-ը պաշտոնապես ներկայացրել է իր թռչող տախտակի (հովերբորդ) նախատիպը, տեղեկացրել է Տոյոտա ընկերությունը։ Amazing in Motion նախագծի շրջանակում ֆիրման մի տեսանյութ է ցուցադրել, որտեղ սքեյթբորդ քշող մարզիկ Ռոս ՄակԳուրանը ցուցադրում է թռչող տախտակի հետ վարվելու առանձնահատուկ տեխնիկա։

Lexus Hoverboard նախագիծը մեկնարկել է տարի ու կես առաջ Դրեզդենից այնպիսի գիտնականների մասնակցությամբ, որոնք մասնագիտացած են մագնիսական լեւիտացիայի ոլորտում։ Հենց դա է դրված հովերբորդի հիմքում․երկրագնդի ձգողության ուժը հաղթահարվում է հովերբորդում տեղադրված գերհաղորդիչները մինչեւ մինուս 197 աստիճան հեղուկ ազոտով սառեցնելու եւ սքեյթ-պարկում մագնիսական ծածկույթ ստեղծելու միջոցով։ Իսկ տախտակը պատրաստված է եղեգից։

Բարսելոնի մոտ՝ Կուբելեսում գտնվող սքեյթ-պարկ Դրեզդենից 200 մետր հատուկ ծածկույթ է բերվել, որում մասնագետները տեղադրել են հարյուրավոր ոչ մեծ մագնիսներ, որոնք ծածկել են ցեմենտով եւ փայտով։

Lexus թռչող տախտակը առայժմ կմնա աշխատանքային նմուշի կարգավիճակում եւ վաճառքի չի հանվի։