Վերպետական միջազգային կառույցներին Հայաստանի անդամակցության հարցը պետք է որոշի բացառապես ժողովուրդը հանրաքվեի միջոցով։ Այս մասին NEWS.am-ի թղթակցի հետ զրույցում ասաց Սահմանադրական բարեփոխումների մասնագիտական հանձնաժողովի անդամ Հրայր Թովմասյանը՝ պատասխանելով հարցին, թե ինչու է Սահմանադրության նոր նախագծով ամրագրվում այս դրույթը։
«Այս հարցը եղել է նուրբ հարց, միջազգային կառույցին անդամակցությունն իշխանության տարրերի զիջում է, եւ սա այնքան կարեւոր հարց է, որ բնակչուևթյունն ինքը պետք է պատասխանի՝ ցանկանում է զիջել ինքնիշխանության տարր, թե ոչ»,- ասաց նա՝ նշելով, որ քաղաքական բացարձակ մեծամասնությունը չպետք է անդամակցության հարց լուծի։
Հրայր Թովմասյանի խոսքով՝ եթե գործող Սահմանադրությունը նման դրույթ ունենար, ապա ԵՏՄ-ին Հայաստանի անդամակցության հարցը կդրվեր հանրաքվեի եւ որոշողը ժողովուրդը կլիներ։
«Մենք փորձել ենք հնարավոր բոլոր կոնֆլիկտների իրավական լուծումները տալ»,- ավելացրեց նա։
Նշենք, որ Սահմանադրության նոր նախագծով առաջարկվում է վերպետական միջազգային կառույցներին Հայաստանի անդամակցության հարցը որոշել հանրաքվեի միջոցով։