Հայաստանի աշխույժ մայրաքաղաք Երեւանից դեպի հյուսիս-արեւելք շուրջ 90 կմ անցնելով՝ մայրուղին նեղանում է՝ վերածվելով լեռնային ճանապարհի: Դուք հասնում եք Տավուշի մարզ, որը հայտնի է հանգստավայրային Դիլիջան քաղաքով: Արտասովոր շոգ եւ խոնավ ամառը ստիպում է «հայկական Շվեյցարիա» ուղեւորվել հանգստացողների ոչ միայն ամբողջ երկրից, այլեւ Վրաստանից, Ռուսաստանից եւ Իրանից, ինչպես նաեւ Եվրոպայի տարբեր երկրներից: Այս մասին «The Huffington Post»-ում հրապարակված հոդվածում գրել է մարքեթինգի, փիարի եւ սոցիալական մեդիայի մասնագետ Ջեքի Աբրահամյանը:
«Չնայած Դիլիջանն այսօր բարձիթողի վիճակում է, վերջին շրջանում այստեղ բացված ռեստորանները, «գիշերակաց եւ նախաճաշ» տիպի իջեւանատները, հյուրանոցները եւ նույնիսկ հյուրանոցային ցանցերը, օրինակ՝ «Best Western»-ը, զարդարում են լանդշաֆտը՝ ակնկալիքով, որ, ինչպես շատերը հույս ունեն, դրանք Դիլիջանին այդքան սպասված աշխուժությունը կբերեն: Տնտեսական վերածննդի հսկայական ծրագրերով ձեռներեցներն ու մեկենասները նպատակ ունեն Դիլիջանը վերածել կրթական, մշակութային, ժամանցի եւ ֆինանսական կենտրոնի ամբողջ տարածաշրջանի համար»,- գրել է նա:
Հեղինակի խոսքով, առաջիկա բումի հետքերն արդեն տեսանելի են բլրի վրա վեր խոյացած Հայաստանի Կենտրոնական բանկի կրթական եւ հետազոտական կենտրոնի ճերմակ բետոնե շենքի փայլուն ապակիներում: Իսկ որ ավելի կարեւոր է, կրթական եւ տնտեսական վերափոխումների ծրագրերն արդեն իրականացվում են «Հայաստանի զարգացման հեռանկարներ» հիմնադրամի եւ Դիլիջանի զարգացման հիմնադրամի գլխավորությամբ, որոնք հիմնել են բարերարներ Ռուբեն Վարդանյանն ու Վերոնիկա Զոնաբենդը:
«Այդպիսի անձանց, կազմակերպությունների եւ բարերարների խորը համոզմունքի, տեսլականի եւ գործունեության շնորհիվ, հնարավոր է, ներկայիս Դիլիջանը կվերականգնի իր նախկին վարկանիշն ու կգերազանցի ակնկալիքները: Անկասկած, դա էլ պետք է սպասել»,- ընդգծել է հոդվածի հեղինակը:
