Հայաստանի նախագահ Սերժ Սարգսյանի հրավերով օգոստոսի 19-ին պետական այցով կնոջ հետ Երեւան կժամանի Ռուսաստանի նախագահ Դմիտրի Մեդվեդեւը։
Ռուսական կողմից պատվիրակությունը կներկայացնեն քաղաքական գործիչներ, տարածաշրջանների ղեկավարներ, ինչպես նաեւ խոշոր գործարարներ։
Նրա այցի շրջանակներում նախատեսվում է Հայաստանում ռուսական 102-րդ ռազմաբազայի ներկայությունը 49 տարով երկարաձգելու մասին արձանագրության ստորագրումը։
Հայաստանում Դմիտրի Մեդվեդեւը կայցելի նաեւ Հայոց ցեղասպանության զոհերի Ծիծեռնակաբերդի հուշահամալիր եւ ծաղիկներ կդնի հուշակոթողին։ Նախատեսվում է, որ Մեդվեդեւը կմասնակցի «Պատվո բլուր» զինվորական գերեզմանի հանդիսավոր բացման արարողությանը, ուր ամփոփված են 19-րդ դարի ռուս-թուրքական պատերազմներին մասնակցած ռուս սպաների մարմինները։
Նշենք, որ բարձրաստիճան հյուրերի այցի կապակցությամբ Երեւանում անվտանգության ապահովման աննախադեպ միջոցներ են ձեռք առնվել։
Օգոստոսի 20-22-ը Հայաստանում տեղի կունենա ՀԱՊԿ ոչ պաշտոնական գագաթաժողովը։ Կառույցի գլխավոր քարտուղար Նիկոլայ Բորդյուժան արդեն իսկ Երեւանում է։
Կազմակերպության անդամ երկրներ են հանդիսանում Հայաստանը, Բելառուսը, Ղազախստանը, Ղրղըզստանը, Ռուսաստանը, Տաջիկստանը եւ Ուզբեկստանը։ Գագաթաժողովին չի մասնակցի միայն Ուզբեկստանի նախագահ Իսլամ Քարիմովը։
