NEWS.am-ը ներկայացնում է հարցազրույց Ռուսաստանում Քուրդիստանի Դեմոկրատական կուսակցության ներկայացուցիչ Հոշավի Բաբաքրի հետ.
Ինչպե՞ս եք գնահատում Թուրքիայում եւ տարածաշրջանում տիրող իրավիճակը` նկատի առնելով այն հանգամանքը, որ Անկարան, Սուրուչում տեղի ունեցած ահաբեկչությունը որպես «Իսլամական պետության» դեմ պայքարի պատրվակ օգտագործելով, Քուրդիստանի բանվորական կուսակցության դեմ ռազմական արշավ է սկսել: Ո՞րն է երկամյա զինադադարի խախտման պատճառը կամ պատճառները:
Իրավիճակը լարված է, որովհետեւ վերջին ժամանակներս կողմերը քայլեր են ձեռնարկել, որոնք հանգեցրել են վերջին երկու տարվա ընթացքում կառուցված «շինության» ոչ ամբողջական, բայց զգալի ավերմանը: Նման քայլեր շատ են եղել: Ես կթվարկեմ նրանք, որոնք իմ կարծիքով հիմնականներն են:
Հիշեցնեմ, որ 2013-ի մարտին Քուրդիստանի բանվորական կուսակցության առաջնորդ Աբդուլլա Օջալանը, որը թուրքական բանտում էր գտնվում, կոչ արեց Անկարայի հետ խաղաղության գործընթաց սկսել, որպեսզի վերջ դրվի ՔԲԿ-ի եւ Թուրքիայի իշխանությունների միջեւ արդեն 30 տարի շարունակվող հակամարտությանը, որը երկու կողմից ավելի քան 30 հազար կյանք է խլել: Այդ նախաձեռնությանն աջակցեց մեկ ուրիշ քուրդ հեղինակավոր առաջնորդ` Մասուդ Բարզանին, որը քիչ ջանք չի գործադրել այդ խաղաղ գործընթացը սկսելու եւ առաջ մղելու համար: Բանակցությունների ընթացքում ձեռք բերված պայմանավորվածությունների հիմնական կետերը հետեւյալն էին. ռազմական գործողությունների դադարեցում, ՔԲԿ-ի պարտիզանների դուրս բերում թուրքական տարածքներից դեպի Իրաքյան Քուրդիստանի տարածք, սահմանադրական փոփոխություններ, որոնք ազգային փոքրամասնությունների համար մշակութային իրավունքներ եւ ազատություններ ապահովեին եւ ՔԲԿ-ի առաջնորդ Աբդուլլա Օջալանի բանտային պայմանների մեղմացում:
Այժմ Թուրքիան ապրում է 80 թվականի ռազմական հեղաշրջման արդյունք սահմանադրությամբ, որում շատ կետեր կան, որոնք նվիրված են այլ ժողովուրդների եւ ազգությունների մերժմանը: Սա ավտորիտար վարչակարգի սահմանադրություն է: Դրա փոփոխումը ամենակարեւոր խոստումներից մեկն էր , որ Թուրքիայի կառավարությունը տվել էր Օջալանի հետ բանակցությունների ընթացքում: Թուրքիայում իշխող կուսակցությունը, որի ղեկավարն է ներկայիս նախագահը` Արդարության եւ զարգացման կուսակցությունը, այդպես էլ վճռականություն չունեցավ փոփոխելու Սահմանադրությունը: Իհարկե, ինքը` ԱԶԿ-ն ընդունում է քրդերին եւ երկրի այլ փոքրամասնությունների, կրթության ոլորտում որոշ բարեփոխումներ է արել, բայց այդ մոտեցումը սահմանադրական բնույթ չի կրում, այսինքն` պետական մակարդակով չի ընդունվում:
Երկրում խորհրդարանական նախորդ ընտրություններին քրդերը ԱԶԿ-ի օգտին էին քննարկել հենց իր «բարի մտադրությունների» համար եւ հենց դա էր պատճառը, որ ԱԶԿ-ին անդամակցում էր քրդական շրջանների 670 ներկայացուցիչ: Բոլորը մեծ հույս ունեին, որ իշխանական կուսակցություն դառնալով` այն կկարողանա փոխել իրավիճակը: Այժմ ԱԶԿ-ում հակառակ իրավիճակն է` նրա շարքերն են լցվել «Ազգայնական շարժում» կուսակցության նախկին անդամներ. այդ բացահայտորեն ազգայնական ուժը միշտ բացասաբար է ազդել Թուրքիայում քրդական հարցի լուծման ընթացքին: ԱԶԿ-ի քուրդ անդամների մի մասը հեռացել է դեպի քրդամետ նորաստեղծ Ժողովուրդների դեմոկրատական կուսակցություն, որն իր մեջ միավորում է տարբեր ազգային, կրոնական եւ սոցիալական փոքրամասնությունների ներկայացուցիչների, այդ թվում նաեւ հայերի:
Թուրքիան անհամաչափ դիրքորոշում որդեգրեց նաեւ Սիրիայում քրդական հարցի վերաբերյալ: Այնտեղ` երկրի քրդական հատվածում` Սիրիական Քուրդիստանում, որը սահմանակից է Թուրքիայի քրդական հատվածին` Թուրքական Քուրդիստանին, «Իսլամական պետության» դեմ կռվում է ՔԲԿ-ին կապված «Դեմոկրատական միության կուսակցությունը» եւ իր ռազմիկները: Նրանք հակաիսլամիստական դաշինքի ռազմական օդուժի աջակցությամբ արդյունավետորեն դիմակայում են ԻՊ-ի ահաբեկիչներին: ԻՊ-ի դեմ պատերազմում նրանց վաստակը ճանաչված է բոլորի կողմից, բայց ոչ Թուրքիայի, որը դրանում շքանշանի միայն մի կողմն է տեսնում. «ԴՄԿ-ի քրդերը ՔԲԿ-ի մասնաճյուղն են, նշանակում է ահաբեկիչներ են»: Դրա համար էլ Թուրքիան փակել է, կամ մասամբ փակել է Սիրիական Քուրդիստանի հետ իր սահմանը, մյուս կողմից էլ կորցրել է քրդերի աջակցությունը ոչ միայն Թուրքիայում, այլեւ Իրանքում, Իրանում եւ Սիրիայում:
Թուրքիայում վերջին խորհրդարանական ընտրություններն ի ցույց դրեցին քրդերի հիասթափությունը. «Ժողովուրդների դեմոկրատական կուսակցությունը» ստացավ ձայների 13%-ը: Այժմ ԱԶԿ-ն այլեւս մեծամասնություն չէ, այլեւս չի կարող որոշել երկրի քաղաքականությունը, իսկ քրդերի հետ հաշտության հեռանկարն անհետանում է: Այժմ Թուրքիան չի կարողանում կառավարություն ձեւավորել: Թուրքիայի նախագահ Ռեջեփ Թայիպ Էրդողանի սրտին այնքան թանկ սահմանադրական փոփոխությունները, որոնք միտված էին խորհրդարանական կառավարումը նախագահականով փոխարինելու, չեն իրականացել: Իսկ նա արդեն նոր նախագահական պալատ է կառուցել:
Իշխանությունների եւ ՔԲԿ-ի միջեւ ոչ մի տեսակի վստահություն չկա: Չնայած` բավականին հեշտ է լուծել քրդական հարցը: Օրինակ`անձամբ Օջալանին հեռուստատեսությամբ ելույթ ունենալու հնարավորություն չեն տալիս: Այդ առաջնորդը հարյուր տոկոսանոց ազդեցություն ունի, նա կարող է խաղաղության հասնել ու մանավանդ` ուզում է դա: Իհարկե, ՔԲԿ-ում ինչ-որ մեկը կհրաժարվի ենթարկվել, կասի, թե դրանք թուրքական հետախուզության խոսքերն են, ոչ թե Օջալանի: Բայց եթե Օջալանն անձամբ ասի դա, արդյունքն իրեն սպասեցնել չի տա: . Կարելի է նաեւ անմիջապես բանակցել Օջալանի եւ իր ՔԲԿ-ի հետ: Բայց դա չի արվում: Պետք է հասկանալ, որ եթե Օջալանը չլինի, այդ հարցը կընկնի ծայրահեղականների ճիրանների մեջ: ՔԲԿ-ն պահանջում է, որ Մարմարա ծովի կղզու բանտում բանտարկված իր առաջնորդն առանց որեւէ պայմանի ազատ արձակվի: Նախագահի իրավասությունների մեջ է մտնում ցանկացած բանտարկյալի ազատել եւ տնային կալանքի փոխադրել, ինչին համաձայն են ՔԲԿ-ում: Չէ՞ որ Թուրքիայում խաղաղության հարցն ամբողջ տարածաշրջանի շահերին է առնչվում: Բայց ազգայնականների ազդեցությունը չափազանց մեծ է, եւ կառավարությունը չի կարող անել խաղաղությանն ընդառաջ այս պարզ քայլերից որեւէ մեկը:
Ինչ վերաբերում է տարածաշրջանային իրավիճակին, առկա է սիրիական ճգնաժամը, իրաքյան պատերազմը, փաստացի` թուրքական պատերազմը: Այդ ձգձգվող հակամարտությունները տանում են դեպի լարվածության մեծացում եւ ավերածություններ, եւ խնդիրների խաղաղ լուծման սկզբունքին այլեւս տեղ չի մնում: Որոշիչը միայն ուժն է լինելու, եւ ամենամեծ վտանգը հենց դա է: Մնում է հույս փայփայել, որ տարածաշրջանային երկրները չեն ցանկանա վտանգել իրենց թեկուզ եւ հարաբերական բարեկեցությունը եւ կօգնեն խուսափել պատերազմի տարածումից: Օրինակ` Իրանը, որը ցանկանում է նորից համաշխարհային հանրության մաս դառնալ եւ իր վրայից հանել էմբարգոն: Բայց մենք բոլորս պիտի հիշենք այն մասին, որ խաղաղության պայմաններում լուծվում են նույնիսկ ամենաբարդ հարցերը, իսկ պատերազմը լուծման ոչ մի տարբերակ չի թողնում:
Ո՞րն է ԱՄՆ-ի դերը թուրքական զինված ուժերի եւ Քուրդիստանի բանվորական կուսակցության ապստամբների միջեւ բախումների հարցում:
ԱՄՆ-ը Թուրքիային պաշտոնապես իրավունք է տվել պաշտպանելու իրեն, բայց հանդես է գալիս Սիրիայում իր քուրդ դաշնակիցների` ԴՄԿ-ի դեմ: Եվ Թուրքիան հաստատել է, որ ԴՄԿ-ի ուժերին հարվածներ չեն հասցվի:
Հատկապես Ստամբուլում ամերիկյան հյուպատոսարանի վրա հարձակումից հետո շատ է ասվում, որ Թուրքիան կկորցնի ԱՄՆ-ի եւ Արեւմուտքի համար իր դերը: Մերձավորարեւելյան տարածաշրջանում ո՞ր երկիրը կարող է ԱՄՆ-ի համար Թուրքիային փոխարինել:
Թուրքիան, ինչպես եւ Իրանը եւ արաբական երկրները (նախ եւ առաջ Սաուդյան Արաբիան եւ Եգիպտոսը) եղել եւ մնում է տարածաշրջանի նշանակալի երկիր, չի կարող կորցնել իր դերը:
Թուրքիայի նախագահ Ռեջեփ Թայիպ Էրդողանը երկու դատական հայց է ներկայացրել քրդական Ժողովուրդների դեմոկրական կուսակցության առաջնորդ Սալահադդին Դեմիրթաշի դեմ նրա համար, որ վերջինս իրեն մեղադրել է Սուրուչի պայթյունը կազմակերպելու եւ «Խոշոր կաշառքի» գործին մեղսակից լինելու համար: Փորձագետների կարծիքով, Էրդողանն այդ քայլերով փորձում է ճնշում գործադրել քրդական կուսակցության վրա` ընտրությունների արդյունքները հաշվի առնելով: Որքա՞ն հեռուն կգնա Էրդողանը, նրա գործողությունները կհանգե՞ն ցանկալի արդյունքի, մասնավորապես, նոր խորհրդարանական ընտրությունների:
Թուրքիայի եւ ՔԲԿ-ի միջեւ պատերազմի պայմաններում խաղաղ ԴՄԿ –ն կարող է այդ հակամարտության անմեղ զոհը դառնալ: Էրդողանը նրանից պահանջում է ավելի կոշտ դիրքորոշում ունենալ ՔԲԿ-ի հանդեպ, իսկ ՔԲԿ-ից էլ` քաղաքական պայքարից հրաժարում: Օրինակ` վերջերս նրանք Թուրքիային սպառնացել են, որ Թուրքական Քուրդիստանի մի մասը (Իրաքի սահմանին տեղակայված քաղաքները` Շիրնակը, Սիլոպին եւ Ջազիրան) կառանձնանան եւ իրենց սեփական կառավարությունը կհռչակեն: Այսպիսով, նրանք այժմ լուրջ ճնշման տակ են, որովհետեւ իրենց կողմնակիցների ճնշող մեծամասնությունը կարեկցում են ՔԲԿ-ին:
Դեռ երեկ Թուրքիայում չէին խոսում խորհրդարանական կրկնակի ընտրության մասին. նախատեսվում էր ԱԶԿ-ի եւ Ժողովրդա-հանրապետական կուսակցության կոալիցիոն կառավարության ստեղծումը: Բայց օգոստոսի 13-ին Թուրքիայի վարչապետ Դավութօղլուն հայտարարել է , որ նման դաշինքն անհնար է կրթության եւ արտաքին քաղաքականության վերաբերյալ էական տարաձայնությունների պատճառով: Այսինքն կառավարություն ձեւավորելու համար ամենայն հավանականությամբ նոր ընտրություններ կանցկացվեն:
Դուք ինչպե՞ս կբնութագրեիք Թուրքիայի քաղաքականությունը Հայաստանի հետ հարաբերությունները կարգավորելու գործընթացում: Ձեր կարծիքով ո՞րն էր Անկարայի իրական նպատակը 2009- հոկտեմբերի 10-ի հայ-թուրքական արձանագրությունները ստորագրելիս:
Հայաստանի եւ Թուրքիայի միջեւ հակամարտությունն ազդում է ամբողջ տարածաշրջանի վրա, այն տարածաշրջանային լարվածության մաս է կազմում: Եթե տարաձայնությունները լուծվեին, սահմաններն էլ բացվեին, բոլոր կողմերը, այդ թվում նաեւ քրդերը կարող էին օգտվել բազմախոստումնալից տնտեսական եւ քաղաքական հնարավորություններից:
Կարող եմ նույնիսկ ասել, որ այդ դեպքում քրդերն ավելի քիչ դրդապատճառներ կունենային սրելու իրավիճակը: Ահմեդ Դավութօղլուի ռազմավարական ծրագիրը` «Զրո խնդիր հարեւանների հետ» պիտի դիտարկի Հայաստանի լուրջ ներգրավում ( ինչը չի արվել Ադրբեջանի ճնշման հետեւանքով): Թուրքիայում ԱԶԿ-ի իշխանության գալով եւ նրանց բաց քաղաքականությամբ պայմանավորված` Թուրքիայի ՀՆԱ-ն սկսել է աճել այնպիսի տեմպով, որն աշխարհում ամենաբարձրերից մեկն է: Դա վերաբերում է նաեւ Թուրքիայի քրդական շրջաններին, որտեղ պատմության մեջ առաջին անգամ տնտեսական աճ է սկսվել: Այդ աճը կարող էր նաեւ Հայաստանի տարածքի վրա տարածվել, նրա աճի մաս կազմել: Ես գիտեմ, որ Հայաստանին սահմանակից տարածքներում ապրող քրդերը շատ հետաքրքրված են բազմակողմանի հարաբերությունների զարգացմամբ:
Զրուցեց Տաթեւիկ Ղազարյանը