Ռուսաստանը օրինականացրել է սահմանին Հայաստանի համար արտոնյալ գինը` 1000 խորանարդ մետրի դիմաց 165 դոլար: Համապատասխան հայ-ռուսական արձանագրության նախագիծը հավանության է արժանացել Հայաստանի կառավարության օգոստոսի 18-ի նիստին:
Այդ գինը հետին թվով օրինականացվում է 2015 թվականի հունվարի 1-ից, երբ Հայաստանը փաստացի սկսեց սահմանին այդ գնով ստանալ գազը: Համաձայնագիրը կգործի մինչեւ 2015 թվականի դեկտեմբերի 31-ը, ինչից հետո անհրաժեշտ կլինի նոր համաձայնագիր ստորագրել: Այն արդեն ուժի մեջ կմտնի երկու երկրում էլ հավանության ներքին գործընթացներից եւ դիվանագիտական ուղիներով հաղորդվելուց հետո, բայց 2015 թվի ավարտից ոչ ուշ:
Հիշեցնենք, որ դեռեւս 2015 թվի ապրիլին «Գազպրոմի» ղեկավար Ալեքսեյ Միլլերը «Ռոսիա 24» հեռուստաալիքին իր տված հարցազրույցում հայտարարել է գնի նվազեցման մասին: Հունիսի 26-ին Հայաստանի նախագահ Սերժ Սարգսյանը, հայ-ռուսական միջկառավարական հանձնաժողովի ռուս համանախագահ Մաքսիմ Սոկոլովին ընդունելով, հայտարարել է, որ հունվարի 1-ից Հայաստանը ռուսական գազը սահմանին գնում է 1000 խորանարդ մետրը 165 դոլարով նախկին 189 դոլարի փոխարեն: Դա հնարավորություն է տվել չեզոքացնել 2014-ի դեկտեմբերին դոլարի նկատմամբ հայկական դրամի փոխարժեքային տատանումների ազդեցությունը:
