Մերձավան գյուղում գտնվող կիսակառույց շինությունում հայտնաբերված տղամարդն աշխատում էր կիսագուլպայի (նասկի) արտադրամասում: Այս մասին NEWS.am-ի թղթակցին հայտնեց Մերձավանի գյուղապետ Լեւոն Գրիգորյանը:
Նա նշեց, որ տղամարդը եկել էր իրենց գյուղ եւ վարձով բնակարան էր փնտրում: Այնուհետեւ հենց այս կիսակառույց շինության մոտ ասել էր, որ իրեն լավ չի զգում, ջուր էին տվել, խմել էր: Մի քանի օր էր անցել, գյուղի երեխաներից մեկը, ով անցնելիս է եղել այդ տարածքով, մտել է այդ շինություն կարիքները հոգալու եւ տեսել տղամարդու դիակը: Անմիջապես հայտնել էր հորը:
Տղամարդը, որին հայտնաբերել են մահացած ու դիակն էլ կիսով չափ հոշոտված, Ջերմուկի բնակիչ է, կինը մահացած է, երկու որդի ունի, որոնք գտնվում են արտերկրում, ասում են՝ ինքն էլ ՌԴ-ի քաղաքացի է:
Ավելի վաղ հայտնել էինք, որ Մերձավան գյուղում գտնվող կիսակառույց շինությունում կենդանիների կողմից կիսով չափ հոշոտված դիակ է հայտնաբերվել: NEWS.am-ի տեղեկություններով՝ Մերձավան գյուղի բնակիչն ահազանգել է իրավապահներին՝ հայտնելով, որ դիակ է տեսել: Մերձավան գյուղի 1-ին փողոցի երկրորդ կիսակառույց շինությունում հայտնաբերել են 55-ամյա Կամո Երանոսյանի դին: Նա բնակվում էր Ջերմուկ քաղաքում: Նախնական տեղեկություններով՝ դիակը հին էր, տղամարդը ձախ ձեռքը կենդանիների կողմից կիսով չափ հոշոտված էր: Նշանակվել է դատաբժշկական փորձաքննություն, նյութեր են նախապատրաստվում: