Հայաստանի Արարատի մարզի Վեդիում ապրող մայրերը, որոնց զավակներն անհետ կորել են ղարաբաղյան հակամարտության գոտում, տաք հագուստ են գործել Գեղարքունիքի շրջանի Վարդենիս քաղաքի հաշմանդամություն ունեցող երեխաների համար:
Նախաձեռնության գաղափարը Կարմիր Խաչի միջազգային կոմիտեի երեւանյան պատվիրակությանն է, որը 2011 թվականից անհետ կորածների ընտանիքներին աջակցության ծրագիր է իրականացնում: NEWS.am-ի թղթակցի հետ զրույցում ԿԽՄԿ-ի սոցիալ-հոգեբանական ծրագրերի պատասխանատու Լուսինե Մկրտչյանը պատմեց, որ նախագիծը տարբեր կողմեր ունի, որոնցից մեկն անհետ կորածների հարազատների հանդիպումներ կազմակերպելն է, նրանց հասարակական ներառմանը նպաստելը, կապերի հաստատումը: «Ի տարբերություն հակամարտության հետեւանքով տուժած այլ ընտանիքների, այս ընտանիքները շարունակում են մնալ «կախված» հոգեբանական վիճակում, երբ հույսը հուսահատությամբ է փոխարինվում: Դա ոչ միայն մեկուսացման է հանգեցնում, այլեւ խանգարում է շրջապատի հետ շփումներին»,- նշեց Լուսինե Մկրտչյանը:
Տարին մի քանի անգամ Կարմիր խաչի հայկական ընկերակցության հետ համագործակցությամբ հանդիպումներ են կազմակերպվում անհետ կորածների հարազատների հետ: Նման հանդիպումներից մեկը տեղի է ունեցել օգոստոսի 21-ին՝ Վարդենիսում, ուր եկել են Վեդիի 9 ընտանիք ներկայացնող կանայք: Ավանդույթի համաձայն, հանդիպումն անցել է «Աստղավարդ» կենտրոնում, որը միավորում է Վարդենիսի եւ ավելի քան 35 համայնքի հաշմանդամություն ունեցող երեխաների ծնողների: Ավանդույթի համաձայն, քանի որ երբ ծրագրվում էր առաջին հանդիպումը, պարզվել է, որ Վարդենիսում այնքան շատ չեն վայրերը, որտեղ հնարավոր լիներ սրտաբաց հանդիպում կազմակերպել: Բայց առաջին հանդիպման հաջողությունն այնպիսին էր, որ այդ օրից դրանք անցկացվում են այս կենտրոնում՝ նրա ղեկավար Մելանյա Եփրեմյանի ակտիվ մասնակցությամբ:
Կենտրոն այցելությունն ու նրա սաների հետ հանդիպումները հուզել են անհետ կորածների մայրերին, որոնք որոշել են տաք իրեր գործել եւ նվիրել երեխաներին: Վեդիում ապրող մայրերն իրենց մտադրությունն իրագործել են օգոստոսի 30-ին նշվող՝ Անհետ կորածների միջազգային օրվան ընդառաջ:
Մանուկների համար գործված հագուստը Վարդենիս են հասցրել հենց վարպետուհիները եւ մի մասը տեղում հագցրել երեխաներին: Պարզվել է՝ երեխաները նույնպես նախապատրաստվել են հանդիպմանը: Նրանք իրենց ձեռքով կախազարդեր են պատրաստել, կենտրոնում՝ կարմիր խաչ, որպես իրենց միավորած ԿԽՄԿ-ի խորհրդանիշ, իսկ ներքեւում՝ Վարդենիս-Արարատ գրություն:
Հանդիպման մասնակից կանայք նաեւ հնարավորություն են ունեցել դիտել շվեյցարացի լրագրողների պատրաստած ֆիլմը, որը նվիրված է ԿԽՄԿ-ի գործունեությանը: Ֆիլմն օգոստոսի 30-ի նախօրեին կցուցադրվի Հայաստանի Հանրային հեռուստատեսությամբ, իսկ առայժմ անհետ կորածների մայրերը կարողացել են դիտել ժապավենի այն հատվածը, որտեղ օգտագործվել են նրանց հետ հարցազրույցները:
Հանդիպումն ավարտվել է Սեւանի ափ այցելությամբ: