Հայոց ցեղասպանության թանգարան-ինստիտուտի տնօրեն Հայկ Դեմոյանը Ռուսաստանի նախագահ Դմիտրի Մեդվեդեւին պատմել է Ծիծեռնակաբերդի՝ Օսմանյան Թուրքիայի Հայոց ցեղասպանության զոհերի հուշահամալիրի շինարարության պատմությունը:
Ինչպես հաղորդում է NEWS.am-ի թղթակիցը, Դեմոյանն ընդգծել է համալիրի նշանակությունն ու խորհուրդը ողջ հայության համար:
Թանգարանի տնօրենը Ռուսաստանի նախագահին ցույց է տվել Մեծ եւ Փոքր Արարատների տեսքը Ծիծեռնակաբերդի բարձունքից՝ նկատելով, որ Ծիծեռնակաբերդը իր բարձրությամբ զիջում է միայն Արարատին:
Հայկ Դեմոյանն ասել է նաեւ, որ Նիկոլայ 1-ին թագավորը, երբ շրջագայել է Կարսով եւ Էրզրումով, այդպես էլ չի կարողացել տեսնել Արարատը մշուշի պատճառով: Երբ թագավորն արդեն շարժվել է դեպի Գյումրի, զինվորներն ասել են նրան, որ մշուշը ցրվել է, եւ Արարատն արդեն տեսանելի է, սակայն էտիկետը թույլ չի տվել թագավորին շրջվել եւ նա այդպես էլ չի տեսել Արարատը:
Հայկ Դեմոյանն ասել է նաեւ, որ Պուշկինն իր «Ուղեւորություն դեպի Էրզրում» գրքում Արարատը շփոթել է Արագած լեռան հետ եւ իր հիշողություններում նկարագրել է Արարատը՝ այն Արագած անվանելով: Դմիտրի Մեդվեդեւն ասել է, թե ծանոթ է այդ ստեղծագործությանը:
