Բեյրութի կենտրոնում ոստիկանության եւ ցուցարարների բախումների հետեւանքով մահացել է 1, վիրավորվել ավելի քան 40 մարդ: Լիբանանի մայրաքաղաքում զանգվածային ցույցերն սկսվել են օգոստոսի 22-ին, որի պատճառը «աղբային ճգնաժամն է»: Արդեն մի քանի ամիս երկրի իշխանությունները չեն կարողացել լուծել քաղաքի թափոնների ուտիլիզացման տարածքային վեճը, որի հետեւանքով քաղաքն ամբողջությամբ աղբանոցի է վերածվել:
Օգոստոսի 22-ի երեկոյան Բեյրութում տեղի ունեցած հանրահավաքի ժամանակ, որին մասնակցել է 5 հազար մարդ, անկարգություններ ու բախումներ են սկսվել ակտիվիստների ու ոստիկանների միջեւ: Տուժել է ավելի քան 35 ցուցարար եւ 15 ոստիկան, այդ թվում մեկ սպա:
MTV-ի փոխանցմամբ, ակտիվիստներից մեկը գանգուղեղի ծանր վնասվածք է ստացել ու մահացել:
Ակտիվիստների խումբը կոտրել է խանութների ապակիները եւ շարունակում է հարձակվել ոստիկանության ջոկատների վրա: Լիբանանյան Կարմիր Խաչը դաշտային հոսպիտալ է կազմակերպել Աշ-Շուհադա հրապարակի սկզբնամասում: Հեռուստաալիքը նշում է, որ տեղում օգնություն է ցուցաբերվել ավելի քան 200 մարդու, որից 40-ին տեղափոխել են հիվանդանոց:
Հաղորդվում է նաեւ, որ լիբանանյան «Ալ-Ջադիդ» հեռուստաալիքի թղթակցին անգիտակից վիճակում հասցրել են հիվանդանոց, որը թունավորվել է արցունքաբեր գազից:
Ցուցարարները պահանջում են կառավարության, ՆԳ նախարար Նուհադ Մաշնուքի եւ բնապահպանության նախարար Մուհամեդ Մաշնուքի հրաժարականը: