Հայաստանն ավելի լավ կզարգանա, եթե երկրի խորհրդարանում չլինի բացարձակ մեծամասնություն: Այս մասին օգոստոսի 24-ի մամուլի ասուլիսում հայտարարել է Միջազգային հարցերով եւ անվտանգության հարցերով հայկական ինստիտուտի ղեկավար, փորձագետ Ստեփան Սաֆարյանը:
Այս պահին, նրա խոսքով, ստեղծված է մի համակարգ, որտեղ հաղթողին է բաժին ընկնում ամեն ինչ: Կոալիցիայի ձեւավորման հարցերը, ըստ Ստեփան Սաֆարյանի, մնացել են Հայաստանի իշխանական կուսակցության խղճին: «Սահմանադրական բարեփոխումների առաջարկված նախագիծը չի վերացնում նախկին թերությունները: Սահմանադրության հիմնական թերությունը՝ իշխանության ճյուղերի հստակ տարանջատումը, ընդհանուր առմամբ շարունակում է մնալ չլուծված: Մենք ընդամենը գործ ունենք ուժային կենտրոնի փոփոխության հետ»,- նշել է Ստեփան Սաֆարյանը:
Գործող սահմանադրությամբ, շարունակել է նա, բավականին խորամանկորեն ներդրված է մի մեխանիզմ, որով դատական իշխանությունը հայտնվում է կախման մեջ գործադիր իշխանությունից: «Դատական իշխանության անկախության խնդիրը լուծված չէ նաեւ սահմանադրական փոփոխությունների ներկա նախագծում »,- շեշտել է Ստեփան Սաֆարյանը:
Հայաստանի նախագահին առընթեր Սահմանադրական բարեփոխումների հարցերով հատուկ հանձնաժողովը ՝ օգոստոսի 20-ի ամփոփիչ նիստում որոշում էր կայացրել հաստատել սահմանադրական բարեփոխումների նախագիծը ՝ ամրակցված հիմնավորումներով ու տրամադրել այն ՀՀ նախագահին: Սերժ Սարգսյանը օգոստոսի 21-ին Հայաստանի Ազգային ժողով էր ուղարկել Սահմանադրական բարեփոխումների նախագիծը:
