«Հայֆիլմ» կինոստուդիան շուտով կվերադարձվի պետությանը: Այդ մասին օգոստոսի 25-ին լրագրողներին հայտարարել է ՀՀ կառավարությանն առընթեր պետգույքի կառավարման վարչության պետ Արման Սահակյանը:
Նրա խոսքով, այդ հարցը շուտով կհաստատվի Կառավարության մոտակա նիստերից մեկի ընթացքում:
Հիշեցնենք, որ 2005-ին կինոստուդիան վաճառվել էր ընդամենը 350 միլիոն դրամով (ներկայիս փոխարժեքով մոտավորապես 725 հազար դոլարով- ծ.խ.): Այժմ կինոստուդիան գնահատվում է 3 միլիարդ դրամից ավելի:
«Իհարկե ներդրողները բավականին աշխատանք են արել, անհրաժեշտ սարքավորումներ են գնել եւ բավականաչափ կինոժապավեն են թվայնացրել: Կինոստուդիայի հետագա ճակատագիրը կտնօրինի կառավարությունը հանձինս մշակույթի նախարարության»,-ավելացրել է Սահակյանը:
Համո Բեկնազարյանի անվան «Հայֆիլմ» կինոստուդիան հիմնադրվել է 1923-ին: Առաջին ֆիլմը նկարահանվել է արդեն 1925-ին (Շիրվանզադեի «Նամուս» պատմվածքի հիման վրա): Կինոստուդիայում են նկարահանվել Խորհրդային Հայաստանի ամենահայտնի ֆիլմերն ու մուլտֆիլմերը: