Մարկ Մուգալյանը, որը հերոսաբար դիմադրել էր Ամստերդամ-Փարիզ գնացքի վրա հարձակված հանցագործին, ծանր վիճակում է: Այդ մասին «Richmond Times Dispatch»-ին հայտարարել է նրա հայրը` Չարլզը:
«Երբ շաբաթ օրն ինձ զանգեց, ուժեղ ձայն ուներ: Բայց հիմա ծանր վիճակում է, երեւում է` անհամեմատ ավելի թույլ է »,-ասել է հայրը:
Ինչպես հաղորդում է պարբերականը, Մուգալյանի քույրը, որը խնդրել է իր անունը չհայտնել, նշել է, որ գուցե Մուգալյանի թոքը վնասված լինի եւ որ նա աջ ձեռքում թմրածություն է զգում: Հանցագործը կրակել է նրա թիկունքին, գնդակը անցել է կոկորդով:
Հոր խոսքով, ինքը հասկացել է, որ որդին շատ ուժեղ է եւ խիզախ, երբ որդին հարթել է իր ուղին` չունենալով ոչ մի բան, փող չունենալով: «Այնպես որ, գնացքում նրա արածը ինձ չզարմացրեց: Նա շատ լավ մարդ է»,-հայտարարել է Չարլզ Մուգալյանը:
Հիշեցնենք, որ ավելի վաղ պարբերականը հաղորդել էր Մուգալյանի հայկական ծագման մասին: Նա Վիրջինիայից տեղափոխված հայերի ընտանիքի անդամ է: Երկար տարիներ նրա հարազատները նպարավաճառի խանութ են ունեցել:
Սորբոնի պրոֆեսոր Մարկ Մուգալյանը հերոսաբար հետ էր մղել հանցագործին Ամստերդամից Փարիզ ուղեւորվող արագընթաց գնացքի վրա հարձակման ընթացքում: