Հայաստանի գլխավոր դատախազ Գեւորգ Կոստանյանն աշխատանքային այցով մեկնել է Վրաստան եւ հանդիպել իր վրացի գործընկերոջ՝ Գիորգի Բադաշվիլիի հետ:
Ինչպես տեղեկացնում է Գլխավոր դատախազության կայքը, երկու երկրների գլխավոր դատախազները քննարկել են ՀՀ եւ Վրաստանի դատախազությունների միջեւ համագործակցության ընդլայնմանը, գործառույթների հստակեցմանն ու արդյունավետության բարձրացմանն ուղղված հարցերի լայն շրջանակ:
Մասնավորապես, կարեւորվել է ՀՀ-ում Վրաստանի քաղաքացիների կողմից եւ Վրաստանում ՀՀ քաղաքացիների կողմից կատարված հանցագործությունների բացահայտման, հետախուզվողների հանձնման եւ, որ ամենակարեւորն է, հանցագործությունների կանխման ուղղությամբ համագործակցությունը, ինչը վերջին տարիներին բավական արդյունավետ է իրականացվում:
Երկուստեք կարեւորվել է մաքսային ոլորտում առկա սերտ համագործակցությունը, որի արդյունավետությունն ակնհայտ է: Գեւորգ Կոստանյանը նշել է, որ Վրաստանի գլխավոր դատախազությունը, միջպետական համագործակցության առումով, հանցավորության դեմ պայքարում ՀՀ հուսալի գործընկերն է:
Երկու երկրների գլխավոր դատախազներն ընդգծել են նոր՝ առավել հստակ համագործակցության հնարավորություն ընձեռող հուշագիր ստորագրելու անհրաժեշտությունը:
Նշենք, որ ՀՀ գլխավոր դատախազի գլխավորած պատվիրակությունը Թբիլիսիից մեկնելու է Աստանա, որտեղ կմասնակցի օգոստոսի 27-ին կայանալիք «ԱՊՀ անդամ պետությունների գլխավոր դատախազների կոորդինացիոն խորհրդի» հերթական նիստին: Ղազախստանի մայրաքաղաքում նախատեսված են նաեւ ՀՀ գլխավոր դատախազի մի շարք երկկողմ հանդիպումներ:
