Լիբիայի ափերին ապօրինի ներգաղթյալների տեղափոխող նավակում Հյուսիսային Աֆրիկայի երկրներից 50 փախստականի մարմին են հայտնաբերել: Դեպի Իտալիա ուղեւորվող նավում եւս 400 մարդ է եղել: Փախստականների զոհվելու պատճառները դեռեւս պարզ չեն:
Փրկարարական գործողությունն իրականացրել է շվեդական «Պոսեյդոն» նավը, որը մասնակցում է ԵՄ-ի «Տրիտոն» փրկարարական գործողությանը: Այս մասին գրում է ՌԻԱ Նովոստին՝ վկայակոչելով իտալական Corriere della Sera-ին:
Եվրամիության «Տրիտոն» գործողության ղեկավարության կողմից օգոստոսին հրապարակված տվյալների համաձայն, 2015 թվականի հունվարից մինչեւ հուլիս ԵՄ տարածք 340 հազար միգրանտ է ժամանել: Անցյալ տարվա նույն ժամանակահատվածում փախստականների թիվը 123.500 է եղել: Հուլիսին, վերջին ամիսների ընթացքում առաջին անգամ, ԵՄ ժամանած միգրանտների թիվը գերազանցել է 100 հազարը՝ կազմելով 107.500 մարդ: