Ղազախստանի կառավարությունը եւ Ատոմային էներգիայի միջազգային գործակալությունը (ՄԱԳԱՏԵ) Աստանայում համաձայնագիր են ստորագրել Ղազախստանի տարածքում թույլ հարստացված ուրանի բանկ ստեղծելու մասին: Ղազախական կողմից փաստաթուղթը ստորագրել է Արտգործնախարար Էռլան Իդրիսովը, իսկ ՄԱԳԱՏԵ-ից` Յուկիա Ամանոն:
Բանկը կտեղակայվի Ուստ-Կամենոգորսկի Ուլբինյան մետալուրգիական գործարանում: Նրանում կպահվի ցածր հարստացված ուրան, որն օգտագործվում է ատոմային էներգետիկայի կարիքների համար: Թույլ հարստացված ուրան ձեռք բերելու հնարավորություն կունենա ՄԱԳԱՏԵ-ի այն անդամը, որը առեւտրական շուկայում այդ նյութը գնելու հնարավորություն չունի, հաղորդում է ՌԻԱ Նովոստին:
Բանկի ստեղծման եւ առնվազն տասը տարի գործելու համար մոտ 150 միլիոն դոլար է հատկացվել: Ղազախստանից բացի, այդ նպատակի համար գումարներ են տրամադրել Եվրամիությունը, Նորվեգիան, ԱՄԷ-ն, Քուվեյթը, ինչպես նաեւ «Միջուկային սպառնալիքի կրճատման նախաձեռնություններ» հիմնադրամը:
Պահեստում պիտի պահվի հումքի որոշ երաշխավորված ծավալ: Կանոնակարգի համաձայն, ցանկացած պետություն կարող է պահեստի պահապանին` իր ԱԷԿ-ների համար վառելիք գնելու հայտ ներկայացնել: