Օգոստոսի 26-ին, ժամը 4.30-ին, ոստիկանության Քանաքեռ-Զեյթունի բաժնում ահազանգ է ստացվել, որ Երեւանի Մ. Մելիքյան փողոցի թիվ 15 շենքի բակում ավտոմեքենայից գողություն է կատարվել:
Ոստիկանության մամուլի ծառայությունից հայտնում են, որ ժամը 5-ին Մ. Մելիքյան փողոցի թիվ 13/Ա հասցեի մոտից, գողություն կատարելու կասկածանքով, բերման է ենթարկվել 35-ամյա Հայկ Թ.-ն:
Պարզվել է, որ նա նշված փողոցի թիվ 14 շենքի բակում կայանված, 30-ամյա Լիլիթ Դ.-ին պատկանող «Օպել Աստրա» մակնիշի ավտոմեքենայի դռան ապակին կոտրելով՝ սրահից գողացել է ձայնարկիչ, հեռակառավարման վահանակ, ձայնարկիչի հզորացուցիչ, բուֆեր, թվային տեսախցիկ եւ ավտոմեքենայի բեռնախցիկում գտնվող ձայնարկիչ` պատճառելով 170.000 դրամի վնաս:
Գողոնն առգրավված է:
Ձեռնարկած միջոցառումների շնորհիվ պարզվել է նաեւ, որ նա նույն օրը, ժամը 3-ին, ապակին կոտրելով՝ նույն փողոցի թիվ 7 շենքի բակում կայանված, 53-ամյա Մկրտիչ Թ.-ի «Օպել» մակնիշի ավտոմեքենայի սրահից գողացել է 10.000 դրամ արժողության թզբեհ:
Կատարվում է հետաքննություն: