Հոսանքի թանկացման հետեւանքով արդեն մեկ տարի անց փոքր եւ միջին ձեռնարկությունների մի մասը փակվելու է: NEWS.am-ի թղթակցի հետ զրույցում նման տեսակետ հայտնեց Հայաստանի գործատուների միության նախագահ Գագիկ Մակարյանը՝ մեկնաբանելով տեղեկությունը, թե ՀԷՑ-ը ստիպում է ՓՄՁ-ներին ստորագրել պայմանագրեր, որտեղ սահմանված էլեկտրաէներգիայի մեկ կվտ/ժամի համար ՓՄՁ ներկայացուցիչը պետք է վճարի 48,78 դրամ՝ նախկին 41,85 դրամի փոխարեն:
Մակարյանի խոսքով՝ հարցված ՓՄՁ ներկայացուցիչներից 81 տոկոսն իրենց վիճակը գնահատում է անբավարար:
«Սա մինչեւ հոսանքի թանկացումն էր, իսկ հիմա մարդկանց վիճակն ավելի ծանր է լինելու, ձեռնարկատիրոջ համար այս պայմաններում յուրաքանչյուր դրամը կարեւոր նշանակություն ունի: Ասում ենք, թե 7 դրամ է ընդամենը, սակայն դրան պետք է գումարել անցած տարվա հոսանքի եւ գազի թանկացումները, եւ կստանանք բավականին մեծ գումար»,- ասաց նա՝ հավելելով, որ սակագնի բարձրացումն առաջացնելու է նաեւ գնաճ:
Մակարյանը կարծում է, որ այս պայմաններում կառավարության սուբսիդավորումն էլ չի կարող օգնել փոքր եւ միջին ձեռնարկություններին: Նա առաջարկում է այդ գումարներն ուղղել Գյումրիում երկրաշարժից հետո անտուն մնացած մարդկանց կարիքները հոգալուն:
Ավելի վաղ «Չորրորդ իշխանությունը» հայտնել էր, որ «ՀԷՑ»-ի ղեկավարությունը չի սպասել՝ մինչեւ ՀՀ իշխանությունները որոշում կայացնեն, եւ արդեն սպառնալիքներով ստորագրել է տվել նոր պայմանագիրը, որտեղ ամրագրված է նոր սակագինը:
