Աստանայում կայացել է ԱՊՀ անդամ-պետությունների գլխավոր դատախազների համակարգող խորհրդի 25-րդ հոբելյանական նիստը՝ նվիրված կառույցի ստեղծման 20-ամյակին:
Ֆորումի աշխատանքներին մասնակցել են ԱՊՀ գլխավոր դատախազությունների պատվիրակությունները՝ Ղազախտանի Հանրապետության գլխավոր դատախազ Ասխատ Դաուլբայեւի, Հայաստանի Հանրապետության գլխավոր դատախազ Գեւորգ Կոստանյանի, Բելառուսի Հանրապետության գլխավոր դատախազ Ալեքսանդր Կոնյուկի, Ղրղզստանի Հանրապետության գլխավոր դատախազ Ինդիրա Ջոլդուբաեւայի, Ռուսաստանի Դաշնության գլխավոր դատախազ Յուրի Չայկայի, Տաջիկստանի Հանրապետության գլխավոր դատախազ Յուսուֆ Ռախմանի, Ադրբեջանի Հանրապետության գլխավոր դատախազի տեղակալ Ռուստամ Ուսուբովի, Մոլդովայի Հանրապետության գլխավոր դատախազի տեղակալ Յուրի Գառաբայի, ինչպես նաեւ ԱՊՀ գործադիր կոմիտեի նախագահ Սերգեյ Լեբեդեւի եւ ԱՊՀ անդամ-պետությունների ԳԴՀԽ քարտուղար Լեոնիդ Երմոլաեւի գլխավորությամբ:
ԱՊՀ անդամ-պետությունների գլխավոր դատախազների համակարգող խորհրդի նախագահ, Ռուսաստանի Դաշնության գլխավոր դատախազ Յուրի Չայկան իր ողջույնի խոսքում ընդգծել է քննարկվող հարցերի կարեւորությունն ու արդիականությունը` տարածաշրջանում նոր մարտահրավերների ու սպառնալիքների առաջանալու համատեքստում:
ՀՀ գլխավոր դատախազն իր խոսքում նշել է, որ ԱՊՀ մասնակից պետությունների գլխավոր դատախազների կոորդինացիոն խորհուրդը այս 20 տարիների ընթացքում ապացուցել է, որ հանդիսանում է անփոխարինելի եւ արդյունավետ հարթակ հանցավորության դեմ պայքարի տեսանկյունից:
«ՀՀ դատախազությունը կարեւորում է միջազգային համագործակցությունը, որն իրականացվում է գործող երկկողմ եւ բազմակողմ միջազգային պայմանագրերի շրջանակներում, ինչպես նաեւ փոխադարձության եւ բարի կամքի սկզբունքների հիման վրա:
Ցանկանում եմ նշել, որ Հայաստանի Հանրապետությունը սույն թվականի հունվարի 2-ից անդամակցում է Եվրասիական տնտեսական միությանը, որն ընդհանուր առմամբ մեր երկրին ընձեռում է շահավետ տնտեսական հեռանկարներ, սակայն անհանգստանալու տեղիք է տալիս այն հանգամանքը, որ գլոբալիզացիայի գործընթացում, ինչը ենթադրում է միջազգային սոցիալ-տնտեսական միասնական գոտու ստեղծում, փոխվում է հանցավորության էությունը՝ որն արդեն կրում է սահմաններ չճանաչող անդրազգային բնույթ` խախտելով մեկից ավելի պետությունների օրենսդրություններ:
ԱՊՀ անդամ բոլոր պետությունների դատախազություններն իրենց ամենօրյա ուշադրության կենտրոնում են պահում տնտեսական բնույթի հանցագործությունները, այս կապակցությամբ ցանկանում եմ նշել, որ անդրազգային հանցագործությունների ուղղվածության փոփոխությունը դեպի տնտեսական հանցագործություններ հանդիսանում է առավել վտանգավոր, քանի որ կատարվում է ինչպես հանցավոր, այնպես էլ օրինական կազմակերպությունների, ինչպես նաեւ մի խումբ անձանց եւ առանձին անհատների կողմից:
ՀՀ գլխավոր դատախազությունը կարեւոր նշանակություն է տալիս այս ուղղությամբ կանխիչ եւ բացատրական աշխատանքներին, եւ այս բնագավառում դատախազական հսկողության արդյունավետությունը առավելապես կախված է օրենսդրական բազայի առկայությունից: Անդրազգային տնտեսական հանցագործությունների դեմ պայքարում գործնական քայլեր ձեռնարկելու համար վճռորոշ են օրենսդրական միջոցների մշակումը եւ մեր գործընկերների հետ ջանքերի միավորումը, ինչն այս ուղղությամբ ժամանակի ընթացքում կուտակված փորձի հիման վրա կարող է դիմակայել, իսկ հետագայում նաեւ կանխել այս տեսակի հանցագործությունները», -նշել է Գ. Կոստանյանը:
Նիստի մասնակիցները քննարկել եւ վերլուծել են գլխավոր դատախազություններում տեղեկատվական համակարգերի ներդրման աշխատանքային փորձը, հանցավորության, կաշառակերության, թմրամիջոցների եւ հոգեմետ նյութերի եւ դրանց պրեկուրսորների ապօրինի շրջանառության դեմ պայքարի փորձը, ծայրահեղական եւ ահաբեկչական դրսեւորումների հակազդման, թմրամոլության, քաղաքացիների՝ ծայրահեղական կազմակերպություններ ներգրավելու, մարդկանց վաճառքի եւ ապօրինի արտագաղթի դեմ պայքարի փորձը:
Հաստատվել են գլխավոր դատախազների համակարգող խորհրդի դրոշն ու խորհրդանշանը, ինչպես նաեւ փաստաթղթեր, որոնք կարգավորում են ԳԴՀԽ համագործակցությունը Հարկային (ֆինանսական) հետաքննության մարմինների ղեկավարների համակարգող խորհրդի եւ ԱՊՀ երկրների ֆինանսական հետախուզության ստորաբաժանումների ղեկավարների խորհրդի հետ:
Քննարկումների արդյունքում ԱՊՀ անդամ-պետությունների գլխավոր դատախազությունների ղեկավարները ստորագրել են օրակարգի որոշումները, որոնք սահմանում են միջազգային համագործակցության առաջնային խնդիրներն առաջիկա ժամանակահատվածի համար, դատախազական հսկողության հիմնական ուղղություններով դրական փորձով փոխանակվելու եւ դրանք գործնականում կիրառելու վերաբերյալ:
