Ռուսաստանի նախագահ Դմիտրի Մեդվեդեւը հստակ հայտարարեց, որ եթե Լեռնային Ղարաբաղը Ադրբեջանի կողմից ռազմական վտանգի տակ հայտնվի, ապա Ռուսաստանը կկատարի դաշնակցի իր պարտականությունները: Այս մասին NEWS.am-ի թղթակցի հետ զրույցում ասաց ԱԺ ՀՀԿ խմբակցության քարտուղար Էդուարդ Շարմազանովը: Նրա խոսքով՝ ՌԴ նախագահի այդ հայտարարությունը բավական հստակ ու պարզ կերպով արտահայտում է ՌԴ դիրքորոշումը:
«Սա մեսիջ է Ադրբեջանին այն մասին, որ Ռուսաստանի համար ընդունելի չէ ռազմատենչ հռետորաբանությունը եւ այդ երկիրը դեմ է ԼՂ խնդրի ռազմական կարգավորմանը»,-ասաց Շարմազանովը: Նա կարծիք հայտնեց, թե ՌԴ նախագահի հայտարարությունը նշանակում է, որ Հայաստանը կարող է հենվել Ռուսաստանի վրա: «Հայաստանը հանդիսանում է ԼՂՀ-ի պաշտպանը, Ռուսաստանն, իր հերթին, հանդիսանում է Հայաստանի դաշնակիցը, եւ պատերազմի դեպքում նրա զինված ուժերը կմասնակցեն պատերազմական գործողություններին»,-ընդգծեց նա:
Նշենք, որ Դմիտրի Մեդվեդեւը օգոստոսի 20-ին տեղի ունեցած մամուլի ասուլիսի ժամանակ, պատասխանելով NEWS.am-ի թղթակցի հարցին, թե ինչպիսի՞ն կլինեն Ռուսաստանի գործողություները ԼՂ ժողովրդի գոյությանը սպառնացող վտանգի դեպքում, ասել է, թե Ռուսաստանի դերը, որպես տարածաշրջանում տնտեսական եւ ռազմական առումով ամենահզոր երկիր, խաղաղության եւ կայունության ապահովումն է: «Ռուսաստանը լրջորեն է վերաբերվում ՀԱՊԿ շրջանակներում իր ստանձնած պարտավորություններին»,- ընդգծել է Դմիտրի Մեդվեդեւը՝ հավելելով, որ Մոսկվան չէր ցանկանա 90-ականների իրադարձությունների կրկնությունը ղարաբաղյան հակամարտության գոտում: