Ֆրանսիան անպատվաբեր է համարում Արեւելյան Եվրոպայի որոշ երկրների դիրքորոշումը, որոք հրաժարվում են իրենց տարածքում փախստականների ընդունել։ Europa-1-ի եթերում նման տեսակետ է հայտնել Ֆրանսիայի ԱԳ նախարար Լորան Ֆաբիուսը, հաղորդում է ՏԱՍՍ-ը։
Դիվանագետը կարծում է, որ Հունգարիան պետք է հանի փշալարով ցանկապատը Սերբիայի հետ սահմանին։ Նրա խոսքով, նման վարքը չի համապատասխանում համաեվրոպական արժեքներին։
ԵՄ սահմանների պաշտպանության Frontex գործակալության տվյալներով, միայն այս տարվա հունվար-հունիս ամիսներին Եվրոպա է մուտք գործել 340 հազար ապօրինի ներգաղթյալ, ինչը 175 տոկոսով ավելի է նախորդ տարվա ցուցանիշից։ Դրա հետ կապված Փարիզը պնդում է, որ պետք է արագացնել Իտալիայում եւ Հունաստանում միգրանտների ընդունման կենտրոնների շինարարությունը։
Միաժամանակ, Ֆրանսիայի նախագահ Ֆրանսուա Օլանդը նշել է, որ անհրաժեշտ է տարբերակում դնել ապաստան խնդրող փախստականների եւ այն ներգաղթյալների միջեւ, որոնք պարզապես ցանկանում են Եվրոպա հասնել ու այնտեղ աշխատանք գտնել։