Քիչ հավանական է, որ Ադրբեջանը լայնածավալ ռազմական գործողություններ սկսի, քանի որ Բաքվում վստահ են, որ պարտություն կկրեն: Այս մասին օգոստոսի 31-ի մամուլի ասուլիսում հայտարարել է «Մոդուս վիվենդի» վերլուծական կենտրոնի ղեկավար Արա Պապյանը:
Նավթի համաշխարհային գների անկումը, նրա խոսքով, տնտեսական ու քաղաքական խնդիրներ է առաջացրել Ադրբեջանում: «Սա զսպող գործոնի դեր է կատարում Ադրբեջանի համար: Մյուս կողմից էլ ադրբեջանական կողմը հասկանում է, որ սա ղարաբաղյան հակամարտությունը ռազմական ճանապարհով լուծելու վերջին հնարավորությունն է»,- նշել է Արա Պապյանը: Ադրբեջանում, շարունակել է նա, ուժեղանում է էթնիկ խմբերի՝թալիշների, թաթերի, եզդիների դժգոհությունը:
Ինչ վերաբերում է ղարաբաղյան խնդրի կարգավորման շուրջ բանակցային գործընթացին ՝ ապա Արա Պապյանի տեսակետից բոլորին հասկանալի է, որ բանակցային ճանապարհով արդեն անհնար է հասնել բոլոր կողմերի համար ընդունելի համաձայնության: «Բանակցային գործընթացը ավելի ու ավելի ձեւական է դառնում »,- հավելել է փորձագետը:
Հիշեցնենք, որ օգոստոսի 28-ին Լեռնային Ղարաբաղի հանրապետության զինված ուժերի հետ շփման գծի արեւելյան ուղղության վրա ադրբեջանական կողմը հետախուզական –դիվերսիոն ներխուժման հերթական փորնձն էր նախաձեռնել: ԼՂՀ պաշտպանության բանակի ստորաբաժանումները ժամանակին նկատել են Ադրբեջանի Զինված ուժերի 20-25 հատուկ նշանակության ջոկատայինների խմբի առաջխաղացումը ու նրանց վնասներ պատճառելով ՝ հետ են մղել մինչեւ ելման դիրքեր: Մարտերի ընթացքում ԼՂՀ Զինված ուժերը կորուստ չեն կրել:
