Սահմանադրական դատարանի անդամ Կիմ Բալայանը կարծում է, որ Սահմանադրական բարեփոխումների մասնագիտական հանձնաժողովը ոչ թե բարեփոխումներ է կատարել, այլ նոր Սահմանադրության տեքստ է ներկայացրել: Այս մասին այսօր՝ օգոստոսի 31-ին, լրագրողների հետ հանդիպմանն ասաց ՍԴ անդամ Կիմ Բալայանը:
Բալայանի խոսքով՝ հանձնաժողովը չի կատարել Հանրապետության նախագահի հրամանագիրը, որով առաջարկում էր բարեփոխումներ կատարել:
«Հանձնաժողովի անդամներին ճանաչում եմ, բոլորն էլ շատ լուրջ սահմանադրագետներ են: Ինչպե՞ս է ստեղծվել այսպիսի տեքստ, որտեղ բարեփոխման մասին խոսք չկա: Ոչ թե բարեփոխումների տեքստ է ներկայացվել, այլ նոր Սահմանադրության»,- ասաց նա:
ՍԴ անդամը կարծում է, որ ներկայացված Սահմանադրությունը մեկ քայլ առաջ է օրինականության տեսանկյունից, քանի որ ժողովրդի իշխանությունը վերադարձվել է ժողովրդին, որը պետք է կատարվի ընտրությունների եւ հանրաքվեի միջոցով:
«Սա չի նշանակում, որ դրական բաներ կան, պետք է փակ պահել բացասականի վրա: Խնդիր կան՝ շարադրանքից սկսած: Կան դրույթներ, որոնք անհասկանալի են եւ անըմբռնելի: Օրինակ, հենց Սահմանադրական դատարանի դատավորների տարիքային ցենզը. Մինչեւ 2005թ. տարիքային ցենզը 70 տարեկանն էր, 2005.-ից հետո դարձավ 65, այս նոր նախագիծն առաջարկում է՝ 70: Անհասկանալի է, թե ինչու»,- ասաց Կիմ Բալայանը:
Հիշեցնենք, որ Սահմանադրության նոր նախագիծն արդեն ուղարկվել է ԱԺ: Աշնանային նստաշրջանի առաջին քառօրյային սկսվում է նախագծի քննարկումները: Ըստ ԱԺ նախագահի՝ հանրաքվեն նախատեսվում է անցկացնել մինչեւ աշնան վերջ:
