ԻՊ-ի եւ Քրդական բանվորական կուսակցության գործոնը էական ազդեցություն չի ունեցել Թուրքիայի արտահերթ խորհրդարանական ընտրություններ անցկացնելու որոշման վրա։ Այս մասին NEWS.am-ի թղթակցի հետ զրույցում հայտարարեց GpoT թուրքական հետազոտական կենտրոնի տնօրեն Մենսուր Աքգյունը՝ մեկնաբանելով հունիսին Թուրքիայում կայացած ընտրություններից հետո խորհրդարանում տիրող իրավիճակը։
Հիշեցնենք, որ խորհրդարանական ընտրություններում Արդարություն եւ զարգացում կուսակցությունը հաղթանակ էր տարել, սակայն 2002թ. ի վեր առաջին անգամ կորցրել էր ձայների բացարձակ մեծամասնությունը եւ չէր կարողացել կառավարություն ձեւավորել։ Այլ ուժերի հետ առկա տարաձայնությունները նրանք չկարողացան հաղթահարել։
«Այս պայմաններում արտահերթ խորհրդարանական ընտրություններն անխուսափելի են»,- հայտարարեց Աքգյունը։
Հարցին, թե հնարավոր է արդյոք, որ Արդարություն եւ զարգացում կուսակցությունը փոխի իր դիրքորոշումը եւ բանակցությունների նոր փուլ սկսի, Աքգյունը պատասխանեց. «Դատելով ամեն ինչից՝ սահմանադրական մեծամասնության համար պայքարն անխուսափելի է, իսկ բանակցությունների վերականգնման համար շատ ուշ է։ Այդ պատճառով էլ, եթե ոչ մի արտակարգ բան տեղի չունենա, Թուրքիայում նոյեմբերի 1-ին արտահերթ ընտրություններ կկայանան։ ԻՊ-ի եւ Քրդական բանվորական կուսակցության գործոնը, ըստ երեւույթին, ոչ մի ազդեցություն չեն ունեցել նոր ընտրությունների մասին որոշում կայացնելու վրա, բայց կարող են ազդել արդյունքի վրա»։
