Թուրքիայում խորհրդարանական ընտրություններից երեք ամիս անց երկիրը Էրդողանի ղեկավարությամբ անկանխատեսելի իրավիճակում է հայտնվել, իսկ նրա առաջնորդին քննադատում են այն բանի համար, որ նա անում է ամեն բան միայն թե մնա իշխանության գլխին։ Այս մասին «Էրդողանի Թուրքիան գնում է դեպի քաոս» վերնագրով հոդվածում գրում է վերլուծաբան Չենգիզ Աքթարը։
Վերլուծաբանի կարծիքով՝ Թուրքիայի նախագահի վերջին քայլերից շատերը հակասում են սահմանադրությանը։
«Նրա վերջին հակասահմանադրական արարքը արտահերթ ընտրություններ նշանակելու հայտարարությունն էր, ինչը գերագույն ընտրական խորհրդի առանձնաշնորհն է»,- գրում է Աքթարը՝ նշելով, որ նախագահը բազմիցս հասկացնել է տվել, որ չի ամաչում իր արարքից։
Ինչպես ընդգծում է վերլուծաբանը, Թուրքիան շարժվում է դեպի անվերջանալի ընտրական գործընթացներ, մինչեւ որ հզոր առաջնորդի կուսակցությունը հաղթանակ չտանի կամ էլ արտահերթ ընտրությունները չլուծարվեն պատերազմական իրավիճակ հայտարարելու պատճառով։
Այսպիսով, այսպես թե այնպես Էրդողանը փորձում է իշխանության գլխին մնալ՝ իր քաղաքական եւ անձնական ապագան ապահովելու համար։
«Այդ նպատակին հասնելու համար նա չի խուսափի ոչ մի միջոցից, այդ թվում՝ ամենամահացու եւ դեպի քաոս տանող միջոցներից»,- գրում է Աքթարը։
Քանի որ Էրդողանը չի կարող պատերազմ սկսել օտարերկրյա պետության դեմ, նա ուղղակի կոնֆլիկտ է բորբոքում քրդերի հետ։ Աքթամի կարծիքով՝ էրդողանի վարչակազմը գնաց քրդերի դեմ պատերազմի, որպեսզի հավաքի ազգայնականների ձայները եւ խորհրդարանում մեծամասնություն ձեւավորի։
Սակայն նախքան Էրդողանի երազանքները կփլուզվեն, Թուրքիան բախվում է ավելի լուրջ մարտահրավերների հետ՝ ակտիվների անկում, Մերձավոր Արեւելքում, մասնավորապես Սիրիայում, քաղաքականության ձախողում, ինչպես նաեւ ԻՊ-ի եւ Թուրքիայի միջեւ ոչ ֆորմալ կապերի առկայության մասին միջազգային հանրության շրջանում աճող կասկածներ։
Աքթարն ընդգծում է, որ Էրդողանը գնալով ավելի է հեռանում իրականությունից։ Նա դարձել է «անձեռնմխելի եւ անպատասխանատու» մարդ, ով այնպիսի որոշումներ է կայացնում, որոնք երկիրը եւ տարածաշրջանը վտանգավոր իրավիճակի մեջ են դնում։ «Դա ոչ ոքի համար լավ չէ։ Դա նշանակում է քաոս Թուրքիայի համար եւ մեծ անկայունություն՝ արդեն անպաշտպան տարածաշրջանի համար։ Ընդհանուր առմամբ ներկայումս Էրդողանը խնդրի եւ ոչ մի դեպքում դրա լուծման մասն է»,- եզրափակում է հեղինակը։