Հայաստանը կթեթեւացնի Ուկրաինայի հարավ-արեւելքից եկած փախստականների սոցիալական բեռը: Առաջարկվող միջոցների փաթեթը հավանության է արժանացել Հայաստանի Կառավարության օգոստոսի 31-ի նիստում:
ՀՀ Աշխատանքի եւ սոցիալական հարցերի նախարար Արտեմ Ասատրյանի խոսքով, քաղաքացիների այդ խմբին սոցիալական վճարումներ կհատկացվեն Հայաստանի օրենսդրությամբ հաստատված կարգով. թոշակներ, հաշմանդամության նպաստներ, կերակրողին կորցնելու, երեխայի ծննդյան առիթով վճարվող գումարներ եւ այլն:
Եթե նախարարության հարցմանն ի պատասխան ուկրաինացի գործընկերները չկարողանան տեղեկություններ տրամադրել, նախարարությունը տեղեկանքներ ու փաստաթղթեր չի պահանջի (այն շրջանների համար, որտեղ իշխանությունը փաստացի չի գործում):
Այդ դեպքում թոշակ եւ նպաստ կվճարվի ըստ Հայաստանի օրենսդրության, հաշվի առնելով քաղաքացու ներկայացրած փաստաթղթերը:
Այդ դեպքերում որոշումը կկայացվի 10 օրվա ընթացքում՝ Ուկրաինայի սոցապահովության մարմինների պատասխանից հետո:
