ՌԴ Ռոստովի մարզի գյուղերից մեկում հայ վարորդի նկատմամբ զանգվածային հաշվեհարդարի մասնակիցներից մեկը ձերբակալվել է, հայտնում է Lifenews-ը։ Պարբերականի տվյալներով՝ երիտասարդն իր «Ֆորդ Ֆոկուս» մեքենայով բախվել էր 5 ավտոմեքենայի։ Հարցաքննության ժամանակ միանգամից մի քանի վկա հայտնել են, որ մահացու հարվածը հայ երիտասարդին հասցրել է 46-ամյա Անդրեյ Զ.-ն։
«Գյուղի բնակչին կանչել են հարցաքննության, եւ նա ներկայացել է իր փաստաբանի հետ։ Նա հրաժարվել է ցուցմունք տալուց՝ որոշելով օգտվել ՌԴ Սահմանադրության 51-րդ հոդվածով ամրագրվող իրավունքից։ Այս պահին տղամարդը ոստիկանության տեղական բաժանմունքում է»,- հայտնել է իրավապահ մարմիններում գործակալության աղբյուրը։
Հիշեցնենք, որ Ռոստովի մարզի գյուղերից մեկում տոնակատարության ժամանակ 23-ամյա Ռաֆայելը նստել էր մեքենայի ղեկին եւ կորցնելով կառավարումը՝ բախվել մեքենաներին։ Մոտ 300 համագյուղացիներ նրա նկատմամբ ինքնադատաստան էին տեսել։
Ամբոխը հարձակվել էր մեքենայի վրա, դուրս բերել վարորդին եւ նրա ուղեւորին, որը, ինչպես պարզվել էր, նրա հայրն է։ Հորն օգնության էր եկել մի ոստիկան, իսկ Ռաֆայելը դաժան ծեծի ենթարկվելուց հետո հիվանդանոց էր տեղափոխվել, որտեղ եւ նա ուղեղի արյունազեղումից մահացել էր։
Մահացած 23-ամյա Ռաֆայելն ուներ կին եւ 6-ամսական դուստր։ Երիտասարդի մահվան գործով զբաղվում է ՌԴ Քննչական կոմիտեն։
