Էլեկտրաէներգիայի թանկացման դեմ պայքարող հինգ ակտիվիստները բերման են ենթարկվել ոստիկանների նկատմամբ կատարած իրավախախտ գործողությունների պատճառով: Այս մասին այսօր՝ սեպտեմբերի 1-ին, Բաղրամյան պողոտայում լրագրողների հետ զրույցում հայտարարեց Երևանի փոխոստիկանապետ Վալերի Օսիպյանը։ (ֆոտոռեպորտաժ)
Նրա խոսքով՝ ոստիկանությունը չի կարող կես ժամվա ընթացքում ազատ արձակել նրանց, ինչպես որ ակտիվիստներն են պահանջում, քանի որ ոստիկանությունում համապատասխան գործընթաց է իրականացվում, որի համար պահանջվում է ժամանակ՝ առնվազն` 1-2 ժամ: Նրա խոսքով, եթե կես ժամվա ընթացքում մեկը փորձի փակել Բաղրամյան պողոտան, բերման կենթարկվի:
«Ակտիվիստներին բերման են ենթարկել, որովհետև հայհոյում էին ոստիկաններին, քարերով խփում էին, ջուր էին լցնում ոստիկանների վրա: Անթույլատրելի եմ համարում ոստիկանության հետ այդ ոճով, պայմանով խոսելը, չի կարելի այդպես: Մենք արդեն 2 ժամ է` քաղաքացիներին բացատրում էինք, որ չի կարելի, հասկանում ենք, որ պայքարում եք, բայց նման ձևով չի կարելի պայքարել, ամեն ինչ պետք է անել օրենքի սահմանում: Ակտիվիստների կողմից արված մի գործողություն չկա, որը օրենքի սահմանում է եղել, իսկ ոստիկաններն ի սկզբանե գործել են օրենքով»,-ասաց նա:
Ավելի վաղ NEWS.am-ը տեղեկացրել էր, որ «Ոչ թալանին» նախաձեռնությունը հայտարարել է, որ այսօրվանից վերսկսում է պայքարը էլեկտրաէներգիայի թանկացման դեմ, քանի որ իրենց նախկին պահանջները չեն կատարվել:
Լուսանկարները՝ Արսեն Սարգսյանի /NEWS.am