Արցախի Շուշի քաղաքում սեպտեմբերի 2-ին կայանալու է Հայկական պետական ագրարային համալսարանի արցախյան մասնաճյուղի բացման հանդիսավոր արարողությունը: Այս մասին NEWS.am-ին տեղեկացրեց ԼՂՀ նախագահի մամուլի քարտուղար Դավիթ Բաբայանը՝ անդրադառնալով Լեռնային Ղարաբաղի Հանրապետության անկախության հռչակման 24-րդ տարեդարձին նվիրված տոնական միջոցառումներին:
Նրա խոսքով, Հայկական պետական ագրարային համալսարանի մասնաճյուղն Արցախում հսկայական համալիր կլինի:
«Դա մեծ իրադարձություն է Լեռնային Ղարաբաղի կրթական ոլորտում, ինչպես նաեւ Շուշի քաղաքի զարգացման համար»,- ընդգծեց Դավիթ Բաբայանը:
Նրա խոսքով, վաղ առավոտյան Հայաստանի եւ Արցախի ղեկավարների մասնակցությամբ Ստեփանակերտում հիշատակի քայլերթ կանցկացվի: «Նրանք ծաղիկներ կխոնարհեն ազատամարտիկների, ԼՂՀ Գերագույն խորհրդի առաջին նախագահ Արթուր Մկրտչյանի շիրիմներին: Եվ, իհարկե, տոնական համերգ կկայանա, կբացվի «Թումո» կենտրոնը»,- հավելեց Բաբայանը:
Լեռնային Ղարաբաղի Հանրապետության անկախությունը հռչակվել է 1991 թվականի սեպտեմբերի 2-ին, ԼՂԻՄ Ժողովրդական պատգամավորների շրջանային խորհրդի եւ Շահումյանի շրջանի ժողովրդական պատգամավորների համատեղ նիստի ժամանակ: Այդպիսով, իրացվել է Լեռնային Ղարաբաղի ժողովրդի՝ ինքնորոշման արդար իրավունքը:
