Հայաստանում գործող բիզնեսը այսպես, թե այնպես պարտավոր է էլեկտրաէներգիայի դիմաց նոր սակագնով վճարել: Այս մասին NEWS.am-ի թղթակցի հետ զրույցում ասաց Հանրային ծառայությունները կարգավորող հանձնաժողովի իրավաբանական վարչության ղեկավար Սեդա Շահինյանը:
Ըստ նրա՝ նոր սակագնով աշխատելու համար ՀԷՑ-ի եւ ձեռնարկատիրոջ միջեւ նոր պայմանագրի ստորագրման անհրաժեշտություն էլ չկա, քանի որ ՀԾԿՀ-ն իր որոշումն ընդունել է արդեն, եւ այն ուժի մեջ է մտել օգոստոսի 1-ից:
«Այլ հարց է բիզնեսի տարբեր շրջանակների սուբսիդավորման մեխանիզմները, սակայն դա մեր գործառույթների մեջ չէ, այն կարգավորում է կառավարությունը»,-ասաց էլեկտրաէներգիայի սակագնի բարձրացումը հաստատած հանձնաժողովի իրավաբանական վարչության ղեկավարը:
Հիշեցնենք, որ օգոստոսի 31-ին ՀՀ կառավարության նիստում հաստատվել է էլեկտրաէներգիայի սակագնի սուբսիդավորումը ազգաբնակչության համար, 1 կիլովատի դիմաց 6,93 դրամի չափով: Նույնչափ սուբսիդիա կստանան նաեւ մանր ձեռնարկատերերը (ամսական 0,38 կիլովատից մինչեւ 500 կիլովատ սպառող ձեռնարկությունները սուբսիդիա կստանան 250 կիլովատի դիմաց: Մյուս ձեռնարկատերերը ստիպված պետք է վճարեն նոր սակագնով: