Վրաստանի հետ սահմանին՝ Վերին Լարս հսկիչ անցակետում, մեքենաների կուտակումները գրեթե ցրվել են։ Այս մասին NEWS.am-ի թղթակցի հետ զրույցում հայտարարեց Հայաստանի տրանսպորտի նախարարության փոխադրումների քաղաքականության բաժնի պետ Դավիթ Մելքոնյանը։ Կուտակումների պատճառն այն էր, որ Ռուսաստանում բնակվող հայերը, որոնք ամռանը եկել էին հայրենիք, օգոստոսի վերջին շաբաթը սկսել էին տուն վերադառնալ։ Նրանց մեծ մասը որոշել էր Ռուսաստան վերադառնալ ամռան վերջին օրերին, այդ պատճառով ճանապարհները ծանրաբեռնված էին։
«Մի քանի օր առաջ ճանապարհին գոյացած խցանման մեջ էր մնացել 500-600 մեքենա, սակայն հիմա խնդիրը լուծված է»,- հավելեց Մելքոնյանը։
Երկարաժամկետ հեռանկարում հարցը պետք է լուծել ռուսական կողմում հսկիչ անցակետերի անցումային հնարավորության բարձրացմամբ։ «Մենք մեր ռուս գործընկերներին առաջարկել ենք Հայաստանի քաղաքացիների եւ հայերի հոսքը հաշվի առնելով՝ թարմացնել Վերին Լարս անցակետի ենթակառուցվածքը եւ մեծացնել աշխատակազմը։ Այս հարցերը բարձրացվել են բոլոր մակարդակներով՝ վարչապետի, Հայաստանի տրանսպորտի եւ կապի նախարարի, հայ-ռուսական միջկառավարական հանձնաժողովի, Եվրասիական միության։ Հիմա մենք սպասում ենք մեր առաջարկած լուծումների պատասխանին»,- հավելեց Մելքոնյանը։
