Վարչապետ Հովիկ Աբրահամյանն ընդունել է Հայաստանում Միացյալ Թագավորության արտակարգ եւ լիազոր դեսպան Քեթրին Լիչին, ով ավարտում է իր դիվանագիտական առաքելությունը մեր երկրում: Վարչապետը շնորհակալություն է հայտնել դեսպանին սերտ համագործակցության, ինչպես նաեւ քաղաքական, տնտեսական, հումանիտար եւ այլ բնագավառներում հայ-բրիտանական համագործակցության զարգացման գործում ներդրած ջանքերի համար: Հովիկ Աբրահամյանը կարեւորել է Միացյալ Թագավորության հետ փոխգործակցության հետագա խորացումը եւ հեռանկարային համարել կապերի ընդլայնումը տնտեսության մի շարք ճյուղերում, այդ թվում` արդյունաբերության, գյուղատնտեսության, տեղեկատվական տեխնոլոգիաների եւ այլն:
Իր հերթին, տիկին Լիչը եւս շնորհակալություն է հայտնել վարչապետին արդյունավետ համագործակցության եւ տարբեր ծրագրերի իրականացման գործում ցուցաբերած օժանդակության համար: Դեսպանը գոհունակությամբ նշել է, որ վերջին տարիներին էապես զարգացել են Միացյալ Թագավորության եւ Հայաստանի միջեւ հարաբերությունները, աճել են ՀՀ եւ ՄԹ-ի միջեւ առեւտրաշրջանառության ծավալները եւ վստահություն հայտնել, որ այդ ուղղությամբ քայլերը կկրեն շարունակական բնույթ: Քեթրին Լիչը նշել է, որ ՄԹ-ն շահագրգիռ է Հայաստանի հետ համագործակցության խորացմամբ, ինչպես նաեւ Հայաստան-ԵՄ կապերի ընդլայնմամբ:
Այնուհետեւ զրուցակիցները քննարկել են երկկողմ հետաքրքրություն ներկայացնող մի շարք հարցեր: Անդրադարձ է կատարվել ՀՀ կառավարության գերակա ծրագրերին, տարածաշրջանային տնտեսական իրավիճակին եւ հնարավոր զարգացումներին, հայ-ադրբեջանական սահմանագծում աճող լարվածությանը: Վարչապետ Աբրահամյանը դատապարտել է Ադրբեջանի կողմից հրադադարի ռեժիմի խախտման դեպքերը եւ Տավուշի մարզի սահմանամերձ համայնքների խաղաղ բնակչության, դպրոցների ուղղությամբ արդեն մի քանի օր շարունակվող կրակահերթերը:
