Հայտնի է, որ Ադրբեջանը բռնապետություն է, եւ ժողովրդավարության համդեպ Լեռնային Ղարաբաղի ինչպես իշխանությունների, այնպես էլ ժողովրդի վերաբերմունքը միանգամայն տպավորիչ է: Այս մասին սեպտեմբերի 3-ին կայացած մամուլի ասուլիսում հայտարարեց Եվրոպական ազատ դաշինքի նախագահ Ֆրանսուա Ալֆոնսին:
Արցախ այցելած ֆրանսիացի գործչին քաղաքական տեսանկյունից տպավորել է քաղաքական ուժերի լիարժեքությունը: «Մենք հանդիպեցինք ինչպես իշխանության, այնպես էլ ընդդիմության ներկայացուցիչների հետ: Կարողացանք հանդիպել նաեւ երկրի բարձրագույն ղեկավարությանը: Այդ հանդիպումները ցույց տվեցին, որ ԼՂՀ ժողովուրդը պատրաստ է ներգրավվել հանուն ժողովրդավարության իրականացվող գործընթացներում: Նրանց համար դա կարող է հսկայական քաղաքական հնարավորություն լինել»,- նշեց Ֆրանսուա Ալֆոնսին՝ ընդգծելով, որ Եվրոպան իր առաքելությունն է համարում ժողովրդավարության հաստատմանը նպաստելը: Նա նաեւ հավելեց, որ ակնհայտ է, որ բնության տեսանկյունից Լեռնային Ղարաբաղը հարուստ շրջան է:
«Այսօր, բնականաբար, տնտեսական առումով Լեռնային Ղարաբաղի համար բազմաթիվ սահմանափակումներ կան: Պարզապես ցնցված ենք օդանավակայանով, որը պատրաստ է, բայց չի կարող է որեւէ ինքնաթիռ ընդունել: Շատ կարեւոր է քայլեր ձեռնարկել, որպեսզի Ղարաբաղը կարողանա տնտեսապես շնչել եւ կապեր հաստատել Եվրոպայի հետ»,- ընդգծեց Ֆրանսուա Ալֆոնսին՝ հույս հայտնելով, որ Եվրոպական ազատ դաշինքը կկարողանա նպաստել դրան:
Նույնիսկ հակամարտության առկայության պարագայում Ֆրանսուա Ալֆոնսին պատճառներ չի տեսնում, որոնք կարող են սահմանափակել Արցախի հետ կապերը: «Ինչ վերաբերում է ԼՂՀ ժողովրդին. այն մարտունակ է ոչ միայն եւ ոչ այնքան ռազմական, այլեւ տնտեսական եւ մշակութային տեսանկյունից: Այս ժողովուրդը հպարտ է իր երկրով»,- ընդգծեց Եվրոպական ազատ դաշինքի ղեկավարը:
