Հայաստան-Դանիա ֆուտբոլային հանդիպման ժամանակ այսօր՝ սեպտեմբերի 7-ին, Շանթ Հարությունի որդուն՝ Շահեն Հարությունյանին եւ եւս մի քանի երկրպագուի Վազգեն Սարգսյանի անվան հանրապետական մարզադաշտից հեռացրել են։ Այս մասին NEWS.am-ին ասաց Շահեն Հարությունյանը:
«Մենք ոչ մի բան չէինք պատրաստվում անել, ուղղակի էս կողմ, էն կողմ էինք գնում, եկան, ինձ ու մի քանի տղայի ոստիկանները, թե կարգադրիչները ուժով դուրս հանեցին, բրթեցին, գլորվելով ընկանք»,- ասաց Շահեն Հարությունյանը` նշելով, որ իրենց հեռացրել են երկրորդ խաղակեսի ժամանակ։
Հիշեցնենք, որ խաղի մեկնարկից առաջ ՀՖՖ նախագահ Ռուբեն Հայրապետյանը զրուցել էր Շահենի հետ, նրան հորդորել չկրկնել Հայաստան-Պորտուգալիա խաղի ժամանակ կատարածն ու չներխուժել խաղադաշտ՝ զգուշացնելով, որ դա բացասաբար կանդրադառնա հավաքականի վրա։
Շահեն Հարությունյանը հոր լուսանկարով շապիկով էր գնացել խաղին: Նույն շապիկով նա Հայաստան - Պորտուգալիա Եվրոպայի առաջնության ընտրական հանդիպման առաջին խաղակեսի վերջնամասում ներխուժել էր խաղադաշտ` նպատակ ունենալով բարձրացնել Հայաստանում քաղբանտարկյալների առկայության խնդիրը:
Լուսանկարները՝ Արսեն Սարգսյանի /NEWS.am