Գազալցակայններում տեղի ունեցող պայթյունների հիմնական պատճառը ավտոմեքենաներում տեղադրված անորակ գազաբալոններ են: Այս մասին այսօր՝ սեպտեմբերի 8-ին, լրագրողներին ասաց ՏԿԱԻՆ գազասարքավորումների և վառելիքի օբյեկտների տեխանվտանգության փորձաքննության բաժնի պետ Ռուբեն Բադեյանը:
«Բալոնային տնտեսություն այսօր համարյա չկա, բալոնները բարոյապես եւ ֆիզիկապես մաշվել են: Բալոնը, որն ունի 15 տարի ժամկետ, լինում է՝ քսան տարի շահագործվում է»,- ասաց Ռուբեն Բադեյանը՝ նշելով, որ անգամ ներկրվողները, որ հիմնականում չինական արտադրության են, որակյալ չեն եւ պատահում է՝ պայթում են հինգերորդ լիցքավորումից հետո:
Ռուբեն Բադեյանը նշեց, որ վարորդները շատ ժամանակ առանց թույլտվության են տեղադրում գազաբալոնները: Նրանք գազաբալոնները լիցենզավորված ընկերություններ չեն տանում պարտադիր փորձաքննության: Նրա խոսքով՝ նման անսարք գազաբալոնների հետեւանք էին նաեւ Գառնիում եւ Չարենցավանում գազալցակայաններում տեղի ունեցած պայթյունները, որոնց դեպքում եւ ավտոմեքենաների բալոններն են անորակ եղել, եւ խախտված են եղել դրանց տեղադրման պայմանները:
Այնուամենայնիվ, ըստ մասնագետի, պայթյուններում իրենց մեղավորությունն ունեն նաեւ գազալցակայանների աշխատակիցները, որոնք յուրաքանչյուր վարորդից պարտավոր են պահանջել գազաբալոնի՝ փորձաքննություն անցած լինելու վերաբերյալ փաստաթուղթ:
«Աշխատակիցներն ասում են՝ ում էլ հարցնենք, չունեն փաստաթուղթ: Լինում են դեպքեր, որ լցավորողը հարցնում է, վարորդն ասում է՝ ունի, բայց ցույց չի տալիս: Այստեղ պարզապես վստահությունն է գործում, վերջին երկու պայթյունների ժամանակ լցավորողը հարցրել էր՝ վարորդը ցույց չէր տվել, նա էլ վստահել էր ու լցավորում էր կատարել»,- նշեց Ռուբեն Բադեյանը:
Ռուբեն Բադեյանի խոսքով՝ պայթյունների պատճառ է դառնում նաեւ գազի ճնշման չափի գերազանցումը, որից խուսափելու համար, ըստ նրա, պետք է կառավարության համապատասխան որոշում լինի, որով նման խախտումներ թույլ տված անձիք կպատժվեն:
