Մոսկվայում օգոստոսի 24-ին կայանալու է եռակողմ հանդիպում Ամենայն հայոց կաթողիկոս Գարեգին Բ-ի, Մոսկվային եւ համայն Ռուսիո պատրիարք Կիրիլի եւ Կովկասի մահմեդականների հոգեւոր առաջնորդ Ալահշուքյուր Փաշազադեի միջեւ: Եռակողմ հանդիպման ժամանակ քննարկվելու են ԱՊՀ երկրներում տեղի ունեցած վերջին իրադարձությունները:
Ըստ ադրբեջանական լրատվամիջոցների, Փաշազադեն նշել է, որ եռակողմ հանդիպման ընթացքում հնարավոր է քննարկվի պատրիարք Կիրիլի միջնորդությամբ, հայկական կողմի մոտ գտնվող ԼՂՀ-ի սահմանին Ադրբեջանի նախաձեռնած դիվերսիոն գործողությունների ժամանակ սպանված Մուբարիզ Իբրահիմովի դին վերադարձնելու հարցը:
Ավելի վաղ NEWS.am-ը հաղորդել էր, որ հունիսի 18-ին` ժամը 23.30-ի սահմաններում, Չայլու գյուղի մերձակայքում Ադրբեջանից Լեռնային Ղարաբաղի տարածք էր ներխուժել զինված հետախուզական խմբավորում: Սահմանն անցած ադրբեջանցիներին հաջողվել էր թափանցել ղարաբաղա-ադրբեջանական զորքերի շփման գոտու հյուսիսարեւելյան հատված: Տեղի էր ունեցել դիմահար մերձամարտ: Հայկական կողմի ձեռնարկած միջոցառումների արդյունքում հակառակորդի առաջխաղացումը կասեցվել էր: Թողնելով մեկ դիակ եւ զինամթերք` ադրբեջանցի դիվերսանտները հետ էին քաշվել: Մարտի արդյունքում հայկական կողմը տվել էր չորս զոհ եւ չորս վիրավոր: