Ասիական Զարգացման բանկը (ԱԶԲ) Հայաստանի ինովացիոն գործարարների համար նախագիծ կսկսի: Այս մասին NEWS.am-ի թղթակցի հետ զրույցում հայտարարեց Հայաստանում ԱԶԲ-ի մշտական ներկայացուցիչ Դեւիդ Դոուլը:
Ծրագիրը, ամենայն հավանականությամբ, կազմված կլինի 3 բաղադրիչից: Առաջինը նպատակաուղղված կլինի նորարարությունների եւ բիզնես-ունակությունների զարգացմանը եւ, ամենայն հավանականությամբ, ուղղված կլինի սկսնակ եւ պոտենցիալ գործարարներին, այդ թվում՝ ուսանողներին:
Երկրորդ մասը բիզնեսում նորարարությունների ներդրմանն աջակցությունն է տնտեսության այն ոլորտներում, որոնք ավելի արդյունավետ կարող են դրանք ընդունել:
Վերջին հատվածը գիտելիքների եւ ունակությունների փոխանցումն է արտահանման իրական աճին:
Նախագծի շահառուների թվում կարող են լինել ինչպես գործող ձեռնարկությունները, այնպես էլ սկսնակ գործարարները:
«Մեր փորձագետները կժամանեն հաջորդ շաբաթ՝ Հայաստանի Կառավարության հետ քննարկելու նախագծի մանրամասները: Բնականաբար, նրանք ծրագրում ներգրավված կլինեն նաեւ հետագայում: Հնարավոր է՝ նաեւ միջազգային այլ փորձագետներ ներգրավվեն: Չի բացառվում նաեւ տեխնիկական նպատակներով ֆինանսավորման բաղադրիչը»,- հայտարարեց Դոուլը:
Նախատեսվում է ծրագիրը սկսել 2016 թվականից ոչ ուշ, բայց հավանական է՝ արդեն 2015-ի սկզբին:
