Արարատի մարզի Լուսառատ գյուղի բնակիչներին, որոնք այսօր՝ սեպտեմբերի 18-ին, փակել էին Երեւան-Մեղրի մայրուղին, գյուղնախարար Սերգո Կարապետյանը խոստացել է մինչեւ սեպտեմբեր 25-ը լուծել խաղողի մթերման խնդիրը: Այս մասին NEWS.am-ին ասաց գյուղացիներից մեկը, որը մասնակցել է գյուղացիների եւ նախարարի հանդիպմանը:
«Հավայի տեղը նախարարը փափուկ բարձ դրեց, ասեց՝ նիստ կանենք, կլուծենք խնդիրը, կհանդիպենք գործարանների տերերի հետ, կխնդրենք: Անհասկանալի ձեւով բացատրեց, որ ձեր խաղողը գետնին չի մնա, բայց՝ ի՞նչ ձեւի չի մնա, չհասկացանք»,- ասաց գյուղացին, որը խնդրեց չհրապարակել իր անունը:
Գյուղացին նշեց, որ ինքը 20 տոննա խաղող ունի, բայց մթերման խնդրի պատճառով չի կարողանում հավաքել բերքը եւ ամեն օր 500 կգ կորուստ է ունենում:
«Ես գործարանի հետ պայմանագիր ունեմ 25 տոննայի, իջեցրել են, 10 տոննա են վերցնում: Հիմա էլ բերքը չեմ հավաքում, որովհետեւ ուր տանում եմ, չեն ընդունում: Բերքը մնում, փչանում է»,- ասաց նա:
Մեկ այլ խաղողագործ NEWS.am-ին ասաց, որ այս տարի իրենցից խաղող չեն վերցնում նաեւ Գագիկ Ծառուկյանին պատկանող «Մուլտի Գրուպ» կոնցեռնում:
«Անցած տարիներին ինչքան կար, վերցնում էին, բայց այս տարի միայն 5 տոննա է վերցնում այն դեպքում երբ ամեն գյուղացի մի 30 տոննա խաղող ունի: Էն էլ ամեն մարդուց չեն վերցնում, մենակ նրանցից, ովքեր իրենց մոտից բուժանյութեր են վերցնում ու պարտք ունեն իրենց»,- ասաց նա:
Լուսառատցիները մտադիր են կրկին փակել մայրուղին, մինչեւ անգամ ավելացած բերքը տանել նախարարության շենքի մոտ, եթե մինչեւ սեպտեմբերի 25-ը խնդիրը չլուծվի:
Ավելի վաղ NEWS.am-ը հայտնել էր, որ Լուսառատի հարյուրավոր բնակիչներ՝ այդ թվում կանայք եւ երեխաներ, փակել են Երեւան-Մեղրի մայրուղին: Մայրուղին որոշ ժամանակ փակ պահելուց հետո գյուղնախարարը գնացել է մարզի Նոր Վեդի գյուղ, որտեղ հանդիպել է գյուղացիներին:
