Հայաստանում էլեկտրաէներգիայի սակագնի նվազեցման համար իրական ռեսուրսներ կան։ Այս մասին սեպտեմբերի 23-ին կայացած մամուլի ասուլիսի ժամանակ հայտարարեց «Այլընտրանք» հետազոտական կենտրոնի ղեկավար Թաթուլ Մանասերյանը։

Անդրադառնալով ՀԷՑ-ի ապագային՝ տնտեսագետը հիշեցրեց, որ աուդիտի մասով առաջին քայլն արդեն արվել է։ «Ես ենթադրում եմ, որ ընկերության ներկայիս սեփականատերը, խուսափելով խնդիրներից, ինքն է նախաձեռնել վաճառքը»,- նշեց Մանասերյանը։ Նրա խոսքով՝ պետք է ստուգումներ անցկացվեին, որոնք կբացահայտեին ոչ  միայն էներգետիկային, այլ երկրի տնտեսությանը հասցված վնասը։ «Անընդունելի է, որ Կառավարությունը համաձայնել է փոխհատուցել ընկերության վնասները։ Կառավարությունը պարտավոր չէ փոխհատուցել մասնավոր ընկերության վնասները։ Ստացվում է, որ այդ վնասների պատճառով է սակագինը 2 անգամ բարձրացել»,- նշեց մասնագետը։

Նրա համոզմամբ՝ ռազմավարական նշանակության կառույցների համար (ՀԷՑ խմբ.) լուծումը կարող էր լինել ազգայնացումը, ինչից հետո Հայաստանը մրցույթ կհայտարարեր եւ կվաճառեր այն։ «Ամենալավ տարբերակը բաժնեմասային ընկերության ստեղծումն է, բաժնեմասերը կվաճառվեին հասարակությանը, եւ մենք՝ որպես սպառող, կարող էինք վերահսկել բոլոր գործընթացները»,- եզրափակեց Թաթուլ Մանասերյանը։